जेठ ४, काठमाडौं । नेपाल बैंक लिमिटेले निक्षेप संकलन तथा कर्जा विस्तार दुबैमा उच्च वृद्धि गरेको छ ।
गत वैशाख महीनामा नेपालका २७ ओटा वाणिज्य बैंकहरुमध्ये निक्षेप संकलन तथा कर्जा प्रवाह वृद्धिको आधारमा नेपाल बैंक प्रथम स्थानमा रहेको देखिएको छ ।
गत वैशाख महीनासम्ममा नेपाल बैंकको निक्षेप २४ दशमलव ३५ प्रतिशतले वृद्धि भएको देखिन्छ भने कर्जा विस्तार ३१ दशमलव ९८ प्रतिशतले वृद्धि भएको देखिन्छ । २७ ओटा वाणिज्य बैंकहरुमध्ये १९ ओटा वाणिज्य बैंकहरुको निक्षेप वृद्धि भएको छ भने आठ ओटा वाणिज्य बैंकहरुको निक्षेपमा गिरावट भएको देखिन्छ ।
वाणिज्य बैंकहरुको औसत निक्षेप वृद्धिदर ६ दशमलव २३ प्रतिशत रहेको छ । त्यसैगरि २७ ओटै वाणिज्य बैंकहरुको कर्जा विस्तारमा वृद्धि भएको छ । औषतमा वाणिज्य बैंकहरुको कर्जा विस्तारमा १७ दशमलव ४३प्रतिशतले वृद्धि भएको देखिन्छ ।
वैशाखमसान्तसम्मा वाणिज्य बैंकहरुसँग कुलनिक्षेप ४३ खर्ब ६९ अर्ब रुपैयाँ पुगेको छ भने कुल कर्जा प्रबाह ४१ खर्ब ९१ अर्ब रुपैयाँ पुगेको छ । नेपालबैंकर्स संघले उपलब्ध गराएको तथ्याङ्कअनुशार यस अवधिमा १८ ओटा वाणिज्य बैंकहरुको कर्जा निक्षेप अनुपात(सिडि रेसियो) नेपाल राष्ट्र बैंकले तोकेको सिमा ९० प्रतिशतभन्दा बढि रहेको छ भने नेपाल बैंकको कर्जा निक्षेप अनुपात (सिडि रेसियो) भने राष्ट्र बैंकले तोकेको सिमाभित्रनै(८९ दशमलव ६५ प्रतिशत) रहेको छ ।औसतमा वाणिज्य बैंकहरुको कर्जा निक्षेप अनुपात ९० दशमलव ८८प्रतिशत रहेको छ ।
मुलुकभर २१३ ओटा शाखाहरु, १७० ओटा एटीएम मेसिनका साथै ४७ ओटा एक्टेन्सन काउन्टर मार्फत करीब २० लाख ग्राहकहरुलाई वित्तीय सेवा पुरयाइरहेको उक्त कम्पनीले हाल ग्राहक सेवामा व्यापक सुधार गरि आधुनिक बैंकिङ्ग प्रविधिमार्फत बैकिङ्ग सेवा सुविधा प्रदान गर्दै प्रतिस्पर्धि रुपमा अगाडि बढिरहेको बताएको छ ।
