काठमाडौं । रिडी पावर कम्पनी लिमिटेडले फागुन १८ गते (आज)बाट ५० प्रतिशत हकप्रद शेयर निष्कासन गरेको छ । कम्पनीले १ अर्ब ५४ करोड ८९ लाख १ हजार २०० रुपैयाँको आधारमा ५० प्रतिशत हकप्रद शेयर विक्री गर्न लागेको हो ।
कम्पनीले प्रतिशेयर १०० रुपैयाँ अंकित मूल्यमा १० बराबर ५ को अनुपातमा ७७ लाख ४४ हजार ५०६ कित्ता हकप्रद शेयर निष्कासन गरेको हो । हकप्रद शेयर निष्कासन तथा बाँडफाँटपछि कम्पनीको चुक्ता पूँजी २ अर्ब ३२ करोड ३३ लाख ५१ हजार ८०० रुपैयाँ कायम हुनेछ । यस कम्पनीको संस्थापकतर्फको शेयर २०७३ चैत १८ गतेदेखि सर्वसाधारण शेयरसरह कारोबारयोग्य भएको छ ।
हकप्रद शेयर निष्कसन प्रयोजनका लागि कम्पनीले माघ २२ गते एक दिन बुक क्लोज गरेको थियो । बुक क्लोजको आधारमा माघ २१ गतेसम्म कायम शेयरधनीले मात्र हकप्रद शेयर खरीदका लागि आवेदन दिन सक्नेछन् । कम्पनीको हकप्रद शेयर चैत ८ गतेसम्म विक्रीमा रहनेछ ।
हकप्रद निष्कासनका लागि गराएको रेटिङ्गमा केयर रेटिङ्ग नेपालले कम्पनीलाई समयमा वित्तीय दायित्व वहन गर्ने क्षमतामा मध्यम जोखिम रहेको संकेत गर्ने केयर एनपी डबल बी प्लस इस्यूअर रेटिङ्ग प्रदान गरेको छ । कम्पनीको शेयर निष्कासन तथा विक्री प्रबन्धकमा मुक्तिनाथ क्यापिटल लिमिटेड छ ।
लगानीकर्ताले विक्री प्रबन्धकका साथै कम्पनीको केन्द्रीय कार्यालय, मुक्तिनाथ विकास बैंक र ग्लोबल आइएमई बैंकका तोकिएका शाखा कार्यालयबाट आवेदन दिन सक्नेछन् । यसका साथै नेपाल धितोपत्र बोर्डबाट अनुमतिप्राप्त सम्पूर्ण आस्बा सेवामा सहभागी बैंक तथा वित्तीय संस्था र तिनका तोकिएका कार्यालयबाट आवेदन दिन सकिनेछ । साथै मेरो शेयर अनलाइनमार्फत समेत आवेदन दिन सकिने व्यवस्था छ ।
यो कम्पनी चालू आर्थिक वर्षको दोस्रो त्रैमाससम्म ९ करोड २६ लाख रुपैयाँभन्दा बढी खुद नोक्सानीमा छ । गत वर्षको यस अवधिसम्म कम्पनीले १ करोड ९६ लाख रुपैयाँभन्दा बढी खुद नाफा गरेको थियो । चालू आर्थिक वर्षको ६ महीनामा कम्पनीले ९ करोड ८२ लाख रुपैयाँभन्दा बढी कुल आम्दानी गरेको छ ।
कुल आम्दानी घटेसँगै यस वर्ष कम्पनीले खुद नोक्सानी व्यहोर्नुपरेको छ । गत वर्ष यस अवधिसम्म कम्पनीको कुल आम्दानी १८ करोड ९२ लाख रुपैयाँभन्दा बढी थियो । यस अवधिसम्म ११ रुपैयाँ ९६ पैसा प्रतिशेयर नोक्सानीमा रहेको कम्पनीको प्रतिशेयर नेटवर्थ ९६ रुपैयाँ २५ पैसा छ ।
