असोज २२, काठमाडौं । ऊर्जा, जलस्रोत तथा सिंचाइमन्त्री पम्फा भुसालसँग एशियाली विकास बैंक(एडीबी) को प्रतिनिधिमण्डलले भेटवार्ता गरेको छ ।
ऊर्जा मन्त्रालयमा शुक्रवार भएको भेटवार्तामा एडीबीको अनुदान तथा ऋण सहयोगमा निर्माण भइरहेका विभिन्न आयोजनाका विषयमा छलफल भएको मन्त्री भुसालको सचिवालयले बताएको छ ।
एडीबीका देशीय निर्देशक अर्नाउड काउकोजस्को नेतृत्वको प्रतिनिधिमण्डलले जलस्रोत र सिंचाइका विभिन्न तटबन्ध निर्माण, राजपुर सिंचाइ आयोजना र जलस्रोत ऐनका विषयमा चासो राखेको थियो । ती आयोजनाको खर्चका बारेमा चासो राख्दै देशीय निर्देशक अर्नाउडले कोभिडका हुँदा पनि राम्रो काम भएको र अझै छिटो काम सकाउन आग्रह गरेका थिए ।
त्यसैगरी उक्त प्रतिनिधिमण्डलले बाग्मती नदी सुधार परियोजनाको बाँध निर्माणसम्बन्धी विषयमा मूल कुरा उठाएको र जलस्रोत ऐन चाडो बनाउन पनि आग्रह गरेको थियो । बैंकको सहयोगका नै शिवपुरीमा प्राकृतिक जलाशय निर्माण भइरहेको छ ।
विदेशी निकायले सहयोग गर्ने आधारका लागि पनि सो ऐन आवश्यक भएको एडीबीको भनाइ थियो । ऐन निर्माणका लागि थप प्राविधिक सहयोग आवश्यक परेकामा आफूहरू सहयोग गर्न तयार गरेको प्रतिनिधिमण्डलले बताएको थियो । त्यसैगरी ऊर्जातर्फ ऊर्जा ऐन, प्रशारण लाइन निर्माण, ठूला जलाशय आयोजनाका विषयमा पनि एडीबीले चासो राखेको थियो ।
जवाफमा मन्त्री भुसालले ऐन निर्माणका आफूहरू सक्षम रहेको उल्लेख गर्दै जलस्रोत ऐन हामी आफैं बनाउँछौ भनेकी छन्। जलस्रोत ऐनको मस्यौदा तयार भइरहेको र जलविद्युत् ऐन संसद्मा रहेको उल्लेख गर्दै उनले ऊर्जा तथा सिंचाइ क्षेत्रको विकासका लागि आवश्यक पर्ने वित्तीय एवं प्राविधिक सहयोग आवश्यकताका आधारमा नेपालले प्रस्ताव गर्ने स्पष्ट पारिन् ।
सो अवसरमा ऊर्जा सचिव देवेन्द्र कार्की, जलस्रोत तथा सिंचाइ सचिव सागरकुमार राईसहित मन्त्रालयका उच्च अधिकारीको सहभागिता थियो । रासस
