चैत २४, काठमाडौं । श्रीलंकाका राष्ट्रपति गोताबाया राजापाक्षलाई अर्थमन्त्री खोज्न धौधौ भइरहेको छ ।
राजापाक्षले संयुक्त सरकार गठन गर्न प्रतिपक्ष र आफ्नै गठबन्धन साझेदारहरुलाई पनि अनुरोध गरेका थिए ।
श्रीलंकाले यही महीना कर्जाका लागि अन्तरराष्ट्रिय मुद्रा कोष (आईएमएफ) सँग वार्ता गर्न गइरहेको छ । वार्ता गर्नका लागि वार्ता अगावै अर्थमन्त्री नियुक्त गर्नु पर्ने दाबब राजापाक्ष सामु छ ।
तर अहिलेसम्म उनले अर्थमन्त्रीका उमेदवार पाएका छैनन् । चरम आर्थिक संकटबीच सोमवार राजापाक्षले अर्थमन्त्री रहेका आफ्नै भाइ बसिल राजापाक्षलाई बर्खास्त गरेर अलि साब्रेलाई नियुक्त गरेका थिए । तर साब्रेले नियुक्ति लिएको भोलिपल्ट अर्थात् मंगलवारै राजीनामा दिए ।
सरकारले अधिकारीदेखि निजी क्षेत्रका पेशाकर्मीहरुलाई समेत अर्थमन्त्री बन्नका लागि अनुरोध गरिरहेको छ । तर राष्ट्रपति र उनका निकट सहयोगीहरुले साब्रेको सट्टामा अर्को अर्थमन्त्री पाउन नसकेको प्रशासन निकट स्रोतहरुले बताएको भन्दै अन्तरराष्ट्रिय समाचार संस्था रोयटर्सले समाचार छापेको छ ।
पछिल्लो समय श्रीलंकामा महँगी एक दशकयताकै उच्च स्तरमा उक्लिएको छ । केन्द्र बैंकका नवनियुक्त गभर्नर नन्दलाल विरासिंघेले शुक्रबारको नीतिगत बैठकमा प्रमुख ब्याजदर २ प्रतिशतसम्म बढाउने अपेक्षा गरिएको छ । यसले अर्थतन्त्र झनै दबाबमा आउने र विरोध प्रदर्शन झनै चर्काउने देखिएको छ ।
अहिलेको वित्तीय संकटको समाधान खोज्न राजनीतिक स्थिरता चाहिने साब्रेको भनाई छ । आफूहरुले विश्व बैंक र एडीबीसँग पनि कुरा गर्नु पर्ने भएपनि यो वार्ता कसले गर्छ भनेर उनले उल्टै प्रतिप्रश्न गरेका छन् । एजेन्सीहरु
