माघ १८, काठमाडौं । साताको तेस्रो कारोबार दिन मंगलवार नेप्से परिसूचक १९ दशमलव २९ अंक अर्थात् शून्य दशमलव ६७ प्रतिशतले बढेको छ ।
यो दिन नेप्से परिसूचक २ हजार ८९१ दशलमव ३३ विन्दुमा पुगेको हो । यो दिन कारोबारमा आएका २२३ ओटा धितोपत्रको १ करोड २१ लाख ६७ हजार ६०५ कित्ता शेयर ८० हजार ८२९ पटकमा रू. ६ अर्ब ५७ करोड ४८ लाख ४२ हजार ४१८ दशमलव ११ मा खरीदविक्री भएको छ ।
मंगलवार कारोबारमा आएका ती धितोपत्रहरु मध्ये दुई ओटा धितोपत्रको मूल्यमा सकारात्मक सर्किट लागेको छ । विन नेपाल लघुवित्त वित्तीय संस्थाको शेयरमूल्य १० प्रतिशत र बुद्धभुमि नेपाल हाइड्रोपावर कम्पनीको शेयरमूल्य ९ दशमलव ९९ प्रतिशतले वृद्धि भएसँगै सकारात्मक सर्किट लागेको हो ।
यो दिन विन नेपाल लघुवित्तको शेयरमूल्य प्रतिकित्ता रू. १ हजार ७८१ दशलमव १० र बुद्धभुमि नेपाल हाइड्रोपावरको शेयरमूल्य रू. ६७८ पुगेको छ । त्यसैगरी सबैभन्दा बढी नेरुडे लघुवित्त वित्तीय संस्थाको शेयरमूल्य ३ दशमलव १७ प्रतिशतले घटेको छ ।
कम्पनीको शेयरमूल्य प्रतिकित्ता रू. १ हजार २२० मा झरेको हो । त्यसैगरी दोस्रोमा मेरो माइक्रोफाइनान्सको शेयरमूल्य २ दशमलव २८ प्रतिशत घटेर रू. १ हजार २०० कायम भएको छ ।
मंगलवार सर्वाधिक शेयर खरीदविक्री नेशनल हाइड्रोपावर कम्पनीको भएको छ । उक्त कम्पनीको रू. ३९ करोड १ लाख बराबरको शेयर खरीदविक्री भएको हो । कम्पनीको शेयरमूल्य प्रतिकित्ता रू. ४१७ कायम भएको छ । कम्पनीको यो शेयरमूल्य अघिल्लो कारोबार दिनको तुलनामा ७ दशलमव ५० प्रतिशतले वृद्धि भएको हो ।
यो दिन कम्पनीको ९ लाख ५५ हजार २७० कित्ता शेयर खरीदविक्री भएको छ । कम्पनीले हालसम्म कुनै पनि शेयरधनीलाई कुनै पनि लाभांश दिएको छैन । यस वर्ष कम्पनीले आकर्षक लाभांश दिने चर्चा चलेसँगै सर्वाधिक शेयर खरीदविक्री भएको हो । त्यसैगरी सर्वाधिक शेयर खरीदविक्री हुने दोस्रोमा अरुण भ्याली हाइड्रोपावर रहेको छ । उक्त कम्पनीको रू. ३७ करोड १४ लाख बराबरको शेयर खरीदविक्री भएको छ ।
कारोबारमा आएका १३ ओटा समूहमध्ये चार ओटा समूहको समूहगत परिसूचक घटेको छ भने बाँकी सबै समूहको परिसूचक बढेको छ । समूहगत परिसूचक बढ्नेमा जलविद्युत् समूहको परिसूचक सबैभन्दा बढी ३ दशमलव २२ प्रतिशतले वृद्धि भएको छ । मंगलवार अधिकांश जलविद्युत् कम्पनीको शेयरमूल्यमा वृद्धि भएसँगै यस समूहका लगानीकर्ताले सर्वाधिक कमाएका छन् ।
केहि जलविद्युत् कम्पनीहरु हकप्रद शेयर निष्कासन गर्ने तयारीमा रहेकाले पनि लगानीकर्ताको आकर्षण बढेको हो । त्यस्तै समूहगत परिसूचक बढ्नेमा बैंकिङ समूहको परिसूचक शून्य दशलमव २९ प्रतिशत,विकास बैंक समूहको १ दशमलव ६१ प्रतिशत,वित्त समूहको १ दशमलव ४८ प्रतिशत,नीर्जिवन बीमा समूहको शून्य दशलमव ७ प्रतिशतले वृद्धि भएको छ ।
यसैगरीअन्य समूहको शूून्य दशलमव शून्य ४ प्रतिशत,लघुवित्त समूहको परिसूचक शून्य दशमलव ९ प्रतिशत,म्युुचुअल फण्ड समूहको १ दशलमव ५ प्रतिशत र लगानी समूहको परिसूचक शून्य दशलमव ११ प्रतिशतका दरले वृद्धि भएको छ ।
यो दिन समूहगत समूह अन्तर्गत व्यापार समूहको परिसूचक शून्य दशमलव ५३ प्रतिशत,होटल एण्ड टुरिजम समूहको शून्य दशलमव शून्य ८ प्रतिशत,उत्पादन तथा प्रशोधन समूहको शून्य दशलमव १८ प्रतिशत र जीवन बीमा समूहको शून्य दशमलव १ प्रतिशतले घटेको छ ।
सोमवारको तुलनामा मंगलवार नेप्से परिसूचकसँगै कारोबार रकममा पनि वृद्धि भएको छ । सोमवार रू. ५ अर्ब १५ करोड बराबरको शेयर खरीदविक्री भएको थियो भने यो दिन साढे ६ अर्बभन्दा बढीको शेयर खरीदविक्री भएको छ ।
आगामी जेठ ५ भित्रै स्थानिय निकायको चुनाव गर्ने खबर बाहिरीएसँगै यसको प्रत्यक्ष सकारात्मक प्रभाव शेयर बजारमा परेको देखिन्छ । चुनावका बेला राजनीतिक दलहरुले धेरै खर्च गर्ने भएकाले बजारमा तरलता बढ्ने अनुमानका आधारमा पनि आगामी दिनमा बजार बढ्ने आशाका साथ लगानीकर्ताहरु सक्रिय भएको जस्तो देखिएको छ ।
