माघ २०, काठमाडौं । साताको अन्तिम कारोबार दिन धितोपत्र दोस्रो बजारमा रू. ८ अर्ब ६१ करोड २१ लाख ७४ हजार बराबरको १ करोड ५७ लाख ८० हजार ७१३ कित्ता धितोपत्रको कारोबार भएको छ ।
बिहीवारको कारोबारमा जलविद्युत् कम्पनीहरुले नेतृत्व गरेका छन् । कुल कारोबारमा यस दिन जलविद्युत् कम्पनीहरुको ४४ दशमलव ५५ प्रतिशत हिस्सा रहेको छ ।
नेपाल स्टक एक्सचेञ्ज (नेप्से) का अनुसार बिहीवार जलविद्युत् कम्पनीहरुको मात्र रू. ४ अर्ब ९० करोड ७९ हजार बराबरको ७५ लाख ५८ हजार ८२ कित्ता शेयर कारोबार भएको हो । धितोपत्र दोस्रो बजारमा हाल ४५ जलविद्युत् कम्पनीहरुको शेयर सूचीकृत रहेको छ ।
कम पूँजी भएका यी समूह अन्तर्गतका कम्पनीहरुको शेयर खरीदमा लगानीकर्ताहरुको आकर्षण निरन्तर बढी रहेको छ । बजारमा कम पूँजी र कम मूल्य भएका जलविद्युत् कम्पनीहरुको शेयरमूल्य बढ्ने आशामा लगानीकर्ताहरु आकर्षित भएको देखिन्छ ।
जलविद्युत् कम्पनीहरुले ऋण तिर्नका लागि पनि हकप्रद शेयर निष्कासन गर्न पाउने व्यवस्था भएसँगै त्यसको सकारात्मक प्रभाव शेयरमूल्यमा पर्ने अपेक्षा लगानीकर्ताहरुको छ ।
बिहीवार सर्वाधिक रकमको शेयर कारोबार गर्ने कम्पनीमा पनि जलविद्युत् समूहअन्तर्गतकै अरुणभ्याली हाइड्रोपावर रहेको छ । यस कम्पनीको रू. ८२ करोड ७० लाख ३५ हजार बराबरको शेयर कारोबार भएको हो । सर्वाधिक दोस्रोमा भने अपि पावरको शेयर कारोबार भएको छ । अपि पावरको रू. ५२ करोड ५० लाख १८ हजार बराबरको शेयर खरीदविक्री भएको हो ।
बिहीवार जलविद्युत् समूहको परिसूचक शून्य दशमलव १७ प्रतिशत बढेको छ । यो दिन जलविद्युतसँगै निर्जीवन बीमा समूहको शून्य दशमलव शून्य ९ प्रतिशत परिसूचक बढेको हो । अन्य समूहको परिसूचक भने यो दिन घटेको छ ।
बिहीवार कारोबार रकममा नेतृत्व गरेको जलविद्युत् समूह अन्तर्गतको बुद्धभुमि नेपाल हाइड्रोपावरको शेयरमूल्य ९ दशमलव ७३ प्रतिशत वृद्धि भएको छ ।
त्यस्तै, साहस उर्जाको ६ दशमलव शून्य ६ प्रतिशत, अरुणभ्याली हाइड्रोको ५ दशमलव ३३ प्रतिशत, मैलुङ खोला जलविद्युतको ४ दशमलव २५ प्रतिशत र न्यादी हाइड्रोपावर लिमिटेडको शेयरमुल्य ४ दशमलव १३ प्रतिशत बढेको छ । सर्वाधिक शेयरमूल्य बढ्ने १० कम्पनीभित्र यस दिन ८ जलविद्युत् कम्पनीहरु रहेका छन् ।
