काठमाडौं । नेप्से परिसूचक आइतवार साढे ६ महीनायताकै न्यून विन्दुमा झरेको छ । गत असोज १२ गते १ हजार ८३७ दशमलव ४७ विन्दुमा झरेर उकालो लागेको नेप्से परिसूचक आइतवार पुनः १ हजार ८३८ दशमलव ४८ विन्दुमा झरेको हो ।
बजारमा चैत मसान्तको प्रभाव देखिएको छ । कर तिर्ने र कर्जाको साँवा-ब्याज भुक्तानीको दबाब एकै पटक भएकाले यति बेला बजारमा असर देखिनु स्वाभाविक भएको जानकारहरू बताउँछन् ।
साताको पहिलो कारोबार दिन आइतवार नेप्से परिसूचक १ दशमलव ५२ प्रतिशत घटेर १ हजार ८३८ दशमलव ४८ विन्दुमा झरेको छ । यस दिन २६८ धितोपत्रको ३८ लाख ४३ हजार ७१३ कित्ता २९ हजार २३९ पटकमा रू. १ अर्ब १५ करोड बराबर कारोबार भएको छ ।
कारोबारमा आएका धितोपत्रमध्ये कालिञ्चोक दर्शन लिमिटेडको शेयर मूल्य सबैभन्दा बढी ९ दशमलव ९७ प्रतिशत वृद्धि भई प्रतिकित्ता रू. ३४२ दशमलव ९० पुगेको हो । त्यस्तै दोस्रोमा सानिमा ग्रोथ फण्डको इकाई मूल्य ६ दशमलव ४६ प्रतिशत बढेर रू. ८ दशमलव ७३ पुगेको छ ।
आइतवार सबैभन्दा बढी ‘१०.२५% माछापुच्छ्रे बैंक डिबेन्चर २०८५’ नामक ऋणपत्रको मूल्य ७ दशमलव ७५ प्रतिशत घटेको छ । डिबेन्चरको मूल्य प्रतिकित्ता रू. १ हजार १५ दशमलव ८० कायम भएको हो । त्यस्तै दोस्रोमा कुमारी धनवृद्धि योजनाको इकाई मूल्य ६ दशमलव ६२ प्रतिशत घटेर रू. ७ दशमलव ९० मा झरेको छ ।
यस दिन नबिल बैंकको सर्वाधिक शेयर खरीदविक्री रू. ५ करोड ७८ लाख बराबर भएको हो । कम्पनीको शेयर मूल्य प्रतिकित्ता रू. ५८० कायम भएको छ । कम्पनीको शेयर मूल्य एक वर्षयताकै न्यून विन्दुमा आएको छ । सोही कारण पनि कम्पनीको सर्वाधिक शेयर कारोबार भएको देखिन्छ । सर्वाधिक शेयर खरीदविक्री हुने दोस्रोमा शिवम् सिमेन्ट्सको रू. ५ करोड ७८ लाख ३७ हजार बराबर भएको हो ।
आइतवार कारोबारमा आएका १३ ओटै समूहगत परिसूचक घटेका छन् । जलविद्युत् समूहको परिसूचक सबैभन्दा बढी २ दशमलव ३५ प्रतिशत घटेको छ ।
