जेठ १७, काठमाडौं । नेप्से घट्ने क्रम रोकिएको छैन । साताको दोस्रो कारोबार दिन मंगलवार पनि नेप्से परिसूचक ३५ दशमलव ५३ अंक घटेर २ हजार १३७ दशमलव ९२ विन्दुमा झरेको छ ।
यस अवधिमा कारोबारमा आएका २२९ ओटा धितोपत्रको ३७ लाख ६९ हजार ८१२ कित्ता शेयरको २७ हजार ५१९ पटकमा रू. १ अर्ब ३१ करोड ७६ लाख ९९ हजार ८९ बराबरको शेयर खरीद विक्री भएको छ । मंगलवार नेप्से परिसूचक डेढ वर्ष यताकै न्यून विन्दुमा झरेको हो । २०७७ पुस १९ गते नेप्से परिसूचक २ हजार १७५ मा थियो । सोमवार पनि नेप्से परिसूचक ५० अंकले घटेको थियो ।
कारोबारमा आएका २२९ ओटा धितोपत्रमध्ये उपकार लघुवित्त वित्तीय संस्थाको शेयरमूल्य ८ दशमलव २३ प्रतिशत वृद्धि भएको छ । कम्पनीको शेयरमूल्य प्रतिकित्ता रू. १ हजार ४७५ दशमलव ८० कायम भएको हो । त्यसैगरी दोस्रोमा एनएमी फिप्टीको इकाई मूल्य ४ दशमलव १० प्रतिशत वृद्धि भएर रू. १२ दशमलव ७० कायम भएको छ ।
त्यसैगरी मंगलवार नेपाल इन्भेष्टमेण्ट बैंकको शेयरमूल्यमा नकारात्मक सर्किट लागेको छ । कम्पनीको शेयरमूल्य अघिल्लो कारोबार दिनको तुलनामा ९ दशमलव ९८ प्रतिशत घटेसँगै नकारात्मक सर्किट लागेको हो । कम्पनीको शेयरमूल्य प्रतिकित्ता रू. ३३१ मा झरेको हो । त्यसैगरी दोस्रोमा एनएलजी इन्स्योरेन्स कम्पनीको शेयरमूल्य ६ दशमलव ५० प्रतिशत घटेर रू. ५६१ कायम भएको हो ।
मंगलवार सर्वाधिक शेयर खरीदविक्री एनआईसी एशिया बैंकको भएकोछ । बैंकको रू. ५ करोड ३७ लाख बराबरको शेयर खरीदविक्री भएको हो । कम्पनीको शेयरमूल्य प्रतिकित्ता रू. ७५२ दशमलव ७० कायम भएको छ । त्यसैगरी सर्वाधिक शेयर खरीदविक्री हुने दोस्रोमा नबिल बैंकको रू. ३ करोड ९८ लाख बराबरको भएको हो ।
कारोबारमा आएका १३ समूहगत परिसूचकमध्ये म्युचुअल फण्ड समूहको परिसूचक शून्य दशलमव ४५ प्रतिशत बढेको छ भने बाँकी सबै समूहको समूहगत परिसूचक घटेसँगै नेप्से परिसूचक घटेको हो ।
समूहगत परिसूचक घट्नेमा बैंकिङ समूहको परिसूचक १ दशलमव ९१ प्रतिशत, विकास बैंक समूहको १ दशमलव ४६ प्रतिशत, वित्त समूहको १ दशमलव ५४ प्रतिशत, होटल एण्ड टुरिजम समूहको १ दशमलव २३ प्रतिशत, हाइड्रोपावर समूहको १ दशमलव २४ प्रतिशत, लगानी समूहको १ दशमलव १७ प्रतिशत, जीवन बीमा समूहको शून्य दशमलव ६९ प्रतिशत, उत्पादन तथा प्रशोधन समूहको १ दशमलव ५३ प्रतिशत, निर्जीवन बीमा समूहको २ दशमलव ५६ प्रतिशत, अन्य समूहको १ दशमलव ६७ प्रतिशत र व्यापार समूहको १ दशमलव ७८ प्रतिशतका दरले घटेको हो ।