काठमाडौं । कान्तिपुर पब्लिकेसन्समा केही दिनयता भइरहेको आन्दोलनप्रति सञ्चार क्षेत्रसँग सम्बद्ध संस्थाहरूको ध्यानाकर्षण भएको छ । उक्त पब्लिकेसन्समा कार्यरत कामदार तथा कर्मचारीले आफ्ना माग राख्ने क्रममा प्रकाशनको विक्रीवितरणमै अवरोध पुर्याएको घटनाप्रति समग्र सञ्चार क्षेत्रका लागि दु:खद भएको नेपाल मिडिया सोसाइटी र नेपाल विज्ञापन संघले बताएका छन् । ‘कामदार तथा कर्मचारीले आफ्ना माग कम्पनी व्यवस्थापनसँग प्रस्तुत गर्नु स्वाभाविक भए तापनि जायज मागलाई सभ्य, शिष्ट तथा अनुशासित ढंगबाट राख्नु आवश्यक छ,’ दुवै संस्थाद्वारा सोमवार संयुक्त रूपमा जारी विज्ञप्तिमा भनिएको छ, ‘जायज मागलाई कम्पनी व्यवस्थापनले पनि आफ्नो साधनस्रोत तथा ऐन कानूनको व्यवस्था अनुसार नै सम्बोधन गर्नुपर्दछ ।’
प्रेस स्वतन्त्रता र मिडिया व्यवसाय सञ्चालन विरोधी क्रियाकलापप्रति कोही पनि मुकदर्शक बन्न नहुने सम्बद्ध संस्थाहरूले बताएका छन् । साथै अराजकता, हिंसात्मक चेतावनी, हुलहुज्जत जस्ता मिडिया क्षेत्रलाई बदनाम गराउने क्रियाकलाप नगर्न समेत सचेत गराइएको छ ।
‘आजको खुला परिवेशमा आफ्ना माग सम्बद्ध पक्षसँग राख्नु, वार्ता छलफल गर्नु, त्यसबाट पनि समाधान नभए कानूनी रूपमा पीडित पक्षले उपचार खोज्ने विकल्पमा जानुपर्ने स्वाभाविक बाटो हो । तर भौतिक रूपमा प्रकाशनको वितरणमा अवरोध पुर्याउने कार्यले व्यवस्थापन तथा आन्दोलनरत पक्षबीच झनै अविश्वास तथा मनमुटावको सृजना गर्दछ,’ विज्ञप्तिमा भनिएको छ, ‘सञ्चारगृहमाथि हुने हुलहुज्जत, कुनै पनि नागरिकको नैसर्गिक अधिकारमाथि आक्रमण, हिंसात्मक धम्की दिने प्रवृत्ति र पक्षहरूका बारेमा सचेत रहने नेपाल सरकार र शान्ति सुरक्षाको जिम्मा लिएका सुरक्षा निकायहरूलाई समेत चनाखो हुन आग्रह गर्दछौं ।’ कान्तिपुर पब्लिकेसन्स र आन्दोलनरत पक्षबीच सयंमित रही समस्या समाधानका लागि व्यावहारिक एवं कानूनी बाटो नै अवलम्बन गरिनुपर्नेमा जोड दिइएको छ ।
