मंसीर १९, चितवन । भरतपुर महानगरपालिका वडा नम्बर २६ स्थित दिव्यनगर खानेपानी आयोजनाको शिलान्यास गरिएको छ । शनिवार नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले आयोजनाको शिलान्यास गरेका हुन् ।
आयोजनाको शिलान्यास पछि बोल्दै अध्यक्ष प्रचण्डले देशमा चितवनको विकास मोडेलको रुपमा प्रस्तुत गरेको बताए । चितवनमा हरेक क्षेत्रको धमाधम आयोजना शिलान्यास भइरहेको बताउँदै उनले चितवनमा हुने आर्थिक विकास राष्ट्रिय रूपमा अध्ययन गर्ने विषय हुनुपर्ने बताए । चितवन जिल्लाको विकासका लागि स्थानीय, प्रदेश र संघीय सरकारबाट करोडौँ बजेट विनियोजन भएको दाहालले जानकारी दिए ।
२० करोड ९८ लाख ४१ हजार १८१ को लागतमा निर्माण हुन लागेको आयोजनाका लागि सरकारको ९० प्रतिशत र उपभोक्ताको १० प्रतिशत लगानी रहनेछ । आयोजना निर्माण सम्पन्न गर्ने जिम्मा भीमेश्वर डिलिङ तथा निर्माण सेवाले पाएको छ ।
सम्झौताअनुसार आयोजनामा ४५० घनमिटरको एउटा ओभरहेड ट्यांकी, कार्यालय भवन, गार्ड हाउस, १२६ किमी पाइप जडान, एक हजार ८५५ धारा जडान आगामी २०८० असार ७ गतेभित्रमा सम्पन्न गर्नुपर्ने दिव्यनगर खानेपानी तथा सरसफाइ उपभोक्ता संस्थाका अध्यक्ष तुलाराम आचार्यले जानकारी दिए ।
कार्यक्रममा भरतपुर महानगरपालिकाका प्रमुख रेनु दाहालले भरतपुरमा तीव्र विकास भइरहेकोे जिकिर गरिन् । उनले महानगरको प्रमुख उद्देश्य नै विकास निर्माण भएकाले आवश्यकताका आधारमा हरेक क्षेत्रमा बजेट विनियोजन गरेको जानकारी दिईन् ।
भरतपुर महानगरपालिका वडा नम्बर २६ का अध्यक्ष ज्ञानप्रसाद खनालले यो खानेपानी आयोजना निर्माणपछि एक हजार ८५५ घरधुरी लाभान्वित हुने बताए ।
