सुनकोसी मरिण पथान्तरण बहुउद्देश्यीय आयोजनाको काम सुरु भएको छ । आर्थिक र सामाजिक दृष्टिले रणनीतिक साथै रूपान्तरणकारी महìव राख्ने यो आयोजनाकोे जग्गा अधिग्रहणको केही काम सम्पन्न भइसकेको छ भने थप अधिग्रहणको प्रक्रिया अगाडि बढेको छ । ठेकेदार कम्पनीले हाल पूर्वतयारी काम गरिरहेकाले चाँडै सुरुङ निर्माणको काम सुरु हुने दिशामा काम अगाडि बढिरहेको छ । आर्थिक वर्ष २०७६÷७७ को बजेटमै राष्ट्रिय गौरवको आयोजना घोषणा गरिएको सुनकोसी मरिण डाइभर्सन आयोजना गत फागुन २० गते शिलान्यास गरिएको हो । आयोजना निर्माणका लागि ४६ अर्ब १९ करोड तथा बाँकी संरचना निर्माणका लागि ३० अर्ब रुपियाँ खर्च लाग्ने अनुमान रहेको यो आयोजना २०८२÷८३ मा सम्पन्न गर्ने लक्ष्य छ । तीन वर्षमा नदी पथान्तरणको काम सक्ने लक्ष्य छ । सुनकोसी नदीमा १२ मिटर उचाइको बाँध निर्माण गरी १३.३ किमि लामो सुरुङबाट प्रतिसेकेन्ड ६७ क्युसेक पानी मरिण खोलामा खसालिनेछ । मरिण खोलामा खसालिएको पानी साविक बागमती सिँचाइ आयोजनाको सिञ्चित क्षेत्र बारा, रौतहट, धनुषा, महोत्तरी र सर्लाहीको थप एक लाख २२ हजार हेक्टर जमिनमा बाह्रै महिना सिँचाइ उपलब्ध हुनेछ । सिँचाइसँगै विद्युत् उत्पादन पनि हुनेछ र त्यसका लागि ६६ मिटर उचाइबाट मरिण खोलामा पानी खसाल्दा ३१ मेगावाट विद्युत् उत्पादन हुनेछ । आयोजना सुरु भएपछि खेर गइरहेको सुनकोसीको पानीमा अनन्त आशा टुसाएका छन् र तिनलाई यथार्थमा बदल्न समयबद्ध कार्यान्वयन आवश्यक छ ।
