तनहुँमा सुन्तलाको उत्पादन सात सय टनले वृद्धि

तनहुँमा यस वर्ष सुन्तला उत्पादनमा वृद्धि हुने भएको छ । जिल्लामा ८ हजार ९ सय मेट्रिक टन उत्पादन हुने जिल्ला कृषि विकास कार्यालय तनहुँले अनुमान गरेको छ । गतवर्ष असिनाका कारण सुन्तलाको उत्पादनमा कमी आएको थियो । यो वर्ष मौसम राम्रो भएकाले उत्पादनमा वृद्धि हुने अनुमान गरिएको हो । यो वर्ष पर्याप्त पानी परेको, क्षेत्रफल वृद्धि भएको र असिनाले पनि क्षति नपुर्‍याएकाले पोहोरको तुलनामा ७ सय मेट्रिकटन सुन्तला बढी उत्पादन हुने अनुमान गरिएको कृषि कार्यालयका प्रमुख वरिष्ठ कृषि विकास अधिकृत डण्डपाणि खनालले बताए ।तनहुँको आँबुखैरेनी, बरादी, बन्दीपुर, घाँसीकुवा, छाङ, मनपाङ, बैदी, देउराली, तनहुँसुरलगायतका १२ गाविसलाई सुन्तला उत्पादनको दृष्टिले पकेट क्षेत्र तोकिएको छ । यस वर्ष तनहुँको सुन्तलाबाली लगाइएको क्षेत्रफल ५० हेक्टरले वृद्धि भएको छ । गतवर्ष १ हजार हेक्टरमा मात्र सुन्तला खेती भएकोमा यस वर्ष वृद्धि भई १ हजार ५० हेक्टर पुगेको छ ।      वर्ष ६ अंक ३५, बुधवार, २७ असोज, २०६७