काठमाडौं । बुधवार धितोपत्र दोस्रो बजारमा ८१ करोड २० लाख ८९ हजार रुपैयाँ बराबरको कारोबार भएको छ । नेपाल स्टक एक्सचेञ्ज (नेप्से)ले दिएको जानकारी अनुसार यो दिन उक्त रकम बराबरको ३३ लाख ६४ हजार ५६ कित्ता धितोपत्र कारोबार भएको हो ।
मंगलवारको तुलनामा कारोबार रकम बढेको हो । मंगलवार ५७ करोड १४ लाख ८३ हजार रुपैयाँभन्दा बढीको २२ लाख ५८ हजार १८७ कित्ता धितोपत्र कारोबार भएको थियो । यो दिन बजार भने घटेको छ । मंगलवारको तुलनामा बुधवार नेप्से परिसूचक ५ दशमलव ८३ अंक घटेर १ हजार ८५८ दशमलव ५६ विन्दुमा झरेको हो ।
घटेको बजारमा कारोबार रकम भने बढेको हो । यो दिन कुल कारोबारमा सर्वाधिक हिस्सा सोनापुर मिनरल्स एण्ड आयल लिमिटेडले ओगटेको छ । आइतवारदेखि धितोपत्र दोस्रो बजारमा कारोबार शुरु भएको कम्पनीको बुधवार सर्वाधिक १४ करोड ६० लाख रुपैयाँभन्दा बढीको ६ लाख १६ हजार ७७५ कित्ता शेयर कारोबार भएको हो ।
अघिल्ला तीन कारोबार दिन निरन्तर सर्किट लेभलमा मूल्य घटेको कम्पनीको शेयर खरीदका लागि बुधवार भने लगानीकर्ता सक्रिय रहेको देखियो । बुधवार भने कम्पनीको शेयर मूल्य ७ दशमलव ९९ प्रतिशत अर्थात् २० रुपैयाँ ४० पैसाले घटेर अन्तिम मूल्य २३४ रुपैयाँ ८० पैसा कायम भएको छ । कम्पनीको शेयर मूल्य यो दिन सर्वाधिक घटेको हो ।
बुधवार न्यूनतम २३० रुपैयाँसम्म कम्पनीको शेयर मूल्य झरेको थियो । आईपीओभन्दा तल कम्पनीको शेयर मूल्य कायम भएसँगै लगानीकर्ता खरीद गर्न सक्रिय भएको ब्रोकरहरूको भनाइ छ । यस कम्पनीले उद्योग प्रभावित स्थानीयमा प्रतिकित्ता एक सय रुपैयाँ अंकित मूल्यमा प्रिमियमबापत १२५ रुपैयाँ थप गरी प्रतिकित्ता २२५ रुपैयाँ र सर्वसाधारणमा प्रतिकित्ता १०० रुपैयाँमा प्रिमियमबापत १३७ रुपैयाँ ५८ पैसा थप गरी प्रतिकित्ता २३७ रुपैयाँ ५८ पैसामा आईपीओ विक्री गरेको थियो ।
बुधवार घटेको बजारमा सयपत्री हाइड्रोपावरको शेयर मूल्य सर्वाधिक ९ दशमलव ३९ प्रतिशत वृद्धि भएको छ । कम्पनीको शेयर मूल्य प्रतिकित्ता ४७ रुपैयाँ ९० पैसाले बढेर अन्तिम मूल्य ५५८ रुपैयाँ कायम भएको हो । यो दिन हिमालयन लघुवित्त वित्तीय संस्था लिमिटेडको शेयर मूल्य पनि ८ दशमलव ५४ प्रतिशत बढेको छ । कम्पनीको शेयर मूल्य प्रतिकित्ता ४७ रुपैयाँ २० पैसाले बढेर अन्तिम मूल्य ६०० रुपैयाँ कायम भएको छ ।
बुधवार लगानी समूहको परिसूचक शून्य दशमलव शून्य ८ प्रतिशत बढेको छ भने अन्य सबै समूहको घटेको छ । यो दिन बैंकिङको शून्य दशमलव शून्य २ प्रतिशत, विकास बैंकको शून्य दशमलव ३८ प्रतिशत, वित्तको शून्य दशमलव ३७ प्रतिशत, होटल्स तथा पर्यटनको १ दशमलव शून्य १ प्रतिशत, जलविद्युतको शून्य दशमलव ४७ प्रतिशत, जीवन बीमाको शून्य दशमलव ४० प्रतिशत, उत्पादन तथा प्रशोधनको शून्य दशमलव ९८ प्रतिशत, लघुवित्तको शून्य दशमलव ७० प्रतिशत, म्युचुअल फण्डको शून्य दशमलव ५२ प्रतिशत, निर्जीवन बीमाको शून्य दशमलव ३६ प्रतिशत, अन्यको शून्य दशमलव २२ प्रतिशत र व्यापारिक समूहको शून्य दशमलव ५३ प्रतिशत परिसूचक घटेको हो ।
बुधवार कुल बजार पूँजीकरण २८ खर्ब ६२ अर्ब ९९ करोड ३२ लाख कायम भएको छ । मंगलवार यो रकम २८ खर्ब ७१ अर्ब ९८ करोड ७९ लाख रुपैयाँ थियो । मंगलवारको तुलनामा बुधवार कुल बजार पूँजीकरण ८ अर्ब ९९ करोड ४६ लाखले घटेको छ । मंगलवार एकै दिन कुल बजार पूँजीकरण २२ अर्ब रुपैयाँभन्दा बढीले घटेको थियो ।
