राष्ट्रिय पुनर्निर्माण प्राधिकरणले समयमा नै सम्पन्न हुने दावी गरे पनि धरहरा र रानीपोखरी समयमा नै सम्पन्न हुनेमा सांसदहरूले आशंका व्यक्त गरेका छन् । संघीय संसदको राज्यव्यवस्था तथा सुशासन समितिमा सांसद कृष्णगोपाल श्रेष्ठले धरहरा समयभित्रै बन्नेमा आंशका व्यक्त गरे । उनले धरहरा निर्माण गर्ने कम्पनी क्षतिपूर्ति लिने दाउमा रहेको तथा अहिलेको तालले १० वर्षमा पनि धरहरा नबन्ने भन्दै आपत्ति जनाए । धरहरा पुनर्निर्माण समयमा होस् भनेर आफूले आशंका व्यक्त गरेको भन्दै सांसद श्रेष्ठले धरहरा पुनर्निर्माणलाई समयमा सम्पन्न गर्न आफ्नो तर्फबाट सक्दो सहयोग गर्ने बताए ।
