प्रतिकूल समयमा पनि कसरी कमाउँछन् वारेन बफेटले नाफा ? ह्याथवेको नगद सञ्चिति १ खर्ब ३० अर्ब डलर

काठमाडौं । लगानी गुरु भनेर चिनिने अमेरिकी व्यापारी वारेन बफेट (Warren buffet) को कम्पनी बर्कशायर ह्याथवे (Berkshire Hathaway) को मुनाफा बढेको छ । बीमा व्यवसायमा सुधार आएसँगै बफेटको व्यापारिक समूहको मुनाफा पनि बढेको हो ।  यस वर्षको पहिलो त्रैमासमा कम्पनीले कुल ८ अर्ब ५ करोड डलर सञ्चालन मुनाफा गरेको छ । यो गत वर्षको सोही अवधिको भन्दा १२ दशमलव ६ प्रतिशत धेरै हो । सन् २०२२ को जनवरी–मार्च त्रैमासमा कम्पनीको सञ्चालन मुनाफा ७ अबर्ए १६ करोड डलर थियो । बीमा व्यवसाय (Insurance Business)को मुनाफा ह्वात्तै बढ्दा समग्रमा सञ्चालन मुनाफा बढेको बताइएको छ । समीक्षा अवधिमा कम्पनीको नगदको थुप्रो झनै बढेको छ । गएको वर्षको अन्तिम त्रैमासमा १ खर्ब २८ अर्ब डलरबाट नगद सञ्चिति समीक्षा अवधिमा बढेर १ खर्ब ३० अर्ब ६१ करोड डलरमा पुगेको छ । कम्पनीले ४ अर्ब ४० करोड डलर बराबरको शेयर बाइब्याक गरेको छ । यो सन् २०२१ को पहिलो त्रैमासयताकै सबैभन्दा ठूलो शेयर बाइब्याक हो ।  सो अवधिमा कम्पनीले ३५ अर्ब ५० करोड डलर खूद मुनाफा कमाएको छ । अल्पकालीन अवधिको लाभ समेत समावेश गरिने भएकोले खूद मुनाफा धेरै देखिने गरेको छ । यो एक वर्ष अघिको सोही अवधिको भन्दा ६ गुणाभन्दा धेरै हो । शुक्रवार बजार बन्द हुँदासम्म बर्कशायरको 'क' वर्गको शेयरको भाउ ४ दशमलव ९ प्रतिशतले बढेको छ । तर अहिले शेयर कीर्तिमानी स्तरभन्दा ३ प्रतिशत तल छ । एजेन्सी