सिद्धार्थ बैंकको ‘सिद्धार्थ अक्सिजन लोन’ योजना

काठमाडौं (अस) । सिद्धार्थ बैंकले मुलुकभर  बढ्दो कोरोना संक्रमणसँगै संक्रमित बिरामीको उपचारमा अस्पताल तथा नर्सिङ होममा देखिएको अक्सिजन अभावलाई लक्षित गरी ‘सिद्धार्थ अक्सिजन लोन’ योजना सार्वजनिक गरेको छ । योजनाअन्तर्गत बैंकले अक्सिजन उत्पादन गर्ने मेसिन, उपकरण खरिद तथा क्षमता विस्तारका लागि इच्छुक अस्पताल र नर्सिङ होमहरूलाई सहुलियतपूर्ण कर्जा उपलब्ध गराउनेछ । कर्जा अवधिभर बैंकको आधार दरमा कर्जा प्रदान गर्नेछ भने सम्बन्धित संस्थाको नगद प्रवाहको आधारमा कर्जाको सहज भुक्तानी अवधि तय गरिनेछ । कुनै पनि सेवाशुल्क नलाग्ने यो योजनामा सहज रूपमा कर्जा उपलब्ध गराइने बैंकले बताएको छ । यस्तो कर्जामा राष्ट्र बैंकबाट सहुलियत प्राप्त भए सहुलियत कर्जा निर्देशिकाअनुरूप हुनेछ । सीमित अवधिका लागि ल्याइएको कर्जा सुविधाले हाल देशमा विद्यमान अक्सिजन अभाव हटाउन सहयोगी हुने विश्वास बैंकको छ । कोरोना महामारी नियन्त्रण तथा रोकथामका लागि सामाजिक उत्तरदायित्वअन्तर्गत १ करोड ४ लाख प्रदेश तथा स्थानीय सरकारलाई उपलब्ध गराइसकेको बैंकले जनाएको छ ।