वैशाख ८, टोकियो (जापान) । जापान सरकारले कोरोना भाइरसको बढ्दो संक्रमण नियन्त्रण गर्न फेरि आपतकाल लगाउने भएको छ ।
संक्रमितको संख्यामा भएको उच्च वृद्धिका कारण टोकियो, ओसाका र ह्योगोका स्वास्थ्य क्षेत्रमा चाप बढेपछि चाँडै नै आपतकाल लगाउन लागिएको सरकारी स्रोतहरुले बताएका छन् ।
बुधवार अबेर प्रधानमन्त्री योशिहिदे सुगाले स्वास्थ्य प्रमुखहरु नोरिहिसा तामुरा र यासुतोशी निशिमुरासमेत सम्बन्धित अन्य मन्त्रीहरुसँग तेस्रो आपतकाल कस्तो हुनेछ भन्नेबारे छलफल गर्न भेट गर्ने बताइएको छ । ओसाका प्रिफेक्चरल सरकारले केन्द्र सरकारसँग आफ्नो प्रिफेक्चरमा आपतकाल घोषणा गरिदिन अनुरोध गरेको भोलिपल्ट यस्तो समाचार सार्वजनिक भएको हो ।
टोकियो महानगर सरकारले केही दिनमै यस्तो अनुरोध गर्ने योजना बनाइरहेको छ भने ह्योगोले बुधवार आफ्नो कार्यबलको बैठकमा यसबारे निर्णय गर्ने अनुमान गरिएको छ । ‘ओसाका प्रिफेक्चरको अनुरोधलाई विचार गरी अवस्थाको राम्रोसँग मूल्यांकन गर्ने अनि सम्भावित उपायहरुको अध्ययन गरेर हामीहरु छिट्टै निस्कर्षमा पुग्नेछौं,’ सुगाले संसदको सत्रमा भनेका थिए ।
टोकियो ओलम्पिक्स शुरु हुन तीन महीना मात्रै बाँकी रहेको अवस्थामा नयाँ आपतकाल लगाउन लागिएको छ । ताजा आपतकालले टोकियो ओलम्पिक्स र पारालिम्पिक्सको आयोजना प्रभावित नहुने सुगाले बताएका छन् । एजेन्सी
