कास्की । ट्रेकिङ एजेन्सिज एशोसिएशन अफ नेपाल (टान), पश्चिमाञ्चल क्षेत्रीय संघ पोखराले एकदिने पदयात्रा (हाइकिङ) कार्यक्रम आयोजना गरेको छ । पोखरा महानगरपालिकाका–१६ र १९ मा पर्ने घार्मी–ढिकीडाँडा भुप्राङकोटको ग्रामीण क्षेत्रको पदयात्रा मार्गको प्रवद्र्धन गर्न संघले हाइकिङ गरेको हो ।
‘ओझेलेमा परेका पर्यटकीय गन्तव्यको पहिचान गरौं, दिगो पर्यटन, विकास प्रवद्र्धन र संरक्षण गरौं’ नाराका साथ हाइकिङ कार्यक्रम गरिएको हो । कोरोना महामारीले थलिएको पर्यटनलाई चलायमान बनाउन टेवा पुर्याउने उद्देश्यले उक्त कार्यक्रम आयोजना गरिएको टान पोखराका अध्यक्ष सुशीलराज पौडेलले बताए ।
पौडेलले यस रूटको प्रवर्द्धन गर्न भ्रमण तालिका बनाई आफ्ना सदस्य कम्पनीमार्फत अन्तरराष्ट्रिय स्तरमा बजारीकरण गरिने बताए । कार्यक्रममा पूर्वमन्त्री तथा संघीय सांसद जगत विश्वकर्माले गण्डकी प्रदेशको समृद्धिको आधार नै पर्यटन भएको बताए । दीर्घकालीन योजनाका साथ घार्मी–कुरेचौर–ढिकीडाँडा–झुप्राङकोट पदमार्ग रुटलाई प्रवद्र्धन गर्न ठोस योजनासहित काम अघि बढाइनुपर्ने उनको भनाइ थियो ।
पोखरा–१६ का वडा अध्यक्ष जीवन आचार्यले पोखरा बजारबाट नजिक रहेर पनि प्रचारप्रसार नभएका पर्यटकीय स्थलहरूको प्रवद्र्धन गर्नुपर्ने बताए । ‘यस्ता कार्यक्रमले पदयात्रा मार्गको प्रचारप्रसारमा सहयोग पुग्छ,’ उनले भने, ‘आगामी दिनमा टानसँग सहकार्य गरी पदयात्रा मार्गको प्रवद्र्धन गरिनेछ ।’ पदमार्गको प्रवद्र्धनसँगै पूर्वाधारमा पनि जोड दिनुपर्ने उनले बताए ।
कार्यक्रममा टानमा आबद्ध सदस्य कम्पनीका प्रतिनिधि, पोखराका पर्यटकीय संघसंस्थाका प्रतिनिधि, मजदूर संगठनका प्रतिनिधि, पत्रकार लगायतको सहभागिता थियो । घार्मीबाट शुरू भएको पदयात्रा ढिकीडाँडा, कुरेचौर हुँदै भुप्राङकोट पुगेर समापन भएको थियो । कार्यक्रममा गर्लाङ गाउँको सामुदायिक होमस्टेका सदस्य समेत सहभागी थिए ।
