वातावरण दिवसमा वृक्षरोपण

काठमाडौं । ५०औं विश्व वातावरण दिवसका अवसरमा मानव अधिकार तथा शान्ति समाजले एक दर्जन जिल्लामा वृक्षरोपण गरेको छ । शान्ति समाज काठमाडौं शाखाद्वारा ‘मेरो फोहोर, मेरो जिम्मेवारी’ नारासहित जोरपाटीमा आयोजित विशेष चेतनामूलक कार्यक्रममा गोकर्णेश्वर नगरपालिकाका प्रमुख दीपक रिसालले वातावरणीय सुधारका कामलाई नगरपालिकाले प्राथमिकतामा राखेको बताए । नगर क्षेत्रका खाली ठाउँमा यही वर्षायाममा बिरुवा रोपिने उनले बताए । कार्यक्रममा वडा नं ५ का अध्यक्ष नारायणबहादुर सुवेदी, सल्लाहकार उत्तम पुडासैनी, शान्ति समाजका महासचिव रामकृष्ण बराल, काठमाडौं शाखा सभापति भगवान पुडासैनीलगायतले वातावरण संरक्षणका लागि हरियाली प्रवर्द्धन गरिनुपर्नेमा जोड दिए । नगर क्षेत्रका खाली स्थानमा बिरुवा रोप्ने अभियानमा साथ दिने उनीहरूको प्रतिबद्धता थियो । सो अवसरमा जोरपाटीस्थित नयाँबस्ती युवा क्लब परिसरअघि वृक्षरोपण गरिएको छ । ओखर, तेजपत्तालगायत जातका करिब ३० बिरुवा त्यस क्षेत्रमा रोपिएको छ । रासस