माघ २२, नयाँदिल्ली । योगगुरु बाबा रामदेवको कम्पनी पतञ्जली आयुर्वेदले पञ्जाव नेशनल बैंक(पीएनबी) र एनपीसीआईको सहकार्यमा भारतमा दुई ओटा क्रेडिट कार्ड सेवा शुरु गरेको छ ।
दुवै कार्ड प्राथमिक चरणमा भारतीय रुपया(भारु) मा आधारित रहने छ । यो साता लञ्च गरिएको उक्त कार्डका अन्य विषेताहरुमा कम शुल्क र ज्यादा लिमिट रहेको छ ।उक्त कम्पनीले पीएनबीको सहकार्यमा रु पे मा आधारित क्रेडिट कार्ड सार्वजनिक गरेको हो । दुई प्रकारका कार्डमा पीएनबी रु पे प्लाटिनम र पीएनबी रु पे सेलेक्ट रहेको बताइएको छ ।
उक्त क्रेडिट कार्डको माध्यमबाट कम्पनीका उत्पादित सामग्री खरीद गरेका उपभोक्ताहरुले आकर्षक क्यासब्याक पाउने छन् । यो सेवा शुरु गर्दा कम्पनीले कुनै शुल्क नलाग्ने पनि बताएको छ । कम्पनीले जारी गरेको बयानमा २ हजार ५०० भारुभन्दा बढीको सामग्रीहरु खरीद गरेमा पहिलो पटक नै २ प्रतिशत क्यासब्याक पाइने छ ।
आईपीओ जारी गर्दै पतञ्जली
भारतीय आयुर्वेदिक सामग्री निर्माता कम्पनी पतञ्जली आयुर्वेदले छिट्टै सार्वजनिक शेयर निष्कासन (आईपीओ) जारी गर्ने तयारी गरिरहेको छ । कम्पनीका सह–संस्थापक योगगुरु बाबा रामदेवले केहि समय अघि यस्तो संकेत गरेका हुन् ।
पत्रकारहरुले कम्पनीलाई शेयर बजारमा सूचीकृत गर्ने योजना छ कि छैन ? भन्ने प्रश्नको उत्तर दिंदै रामदेवले अवको केहिसमय पछि शुभ समाचार आउने बताएका थिए ।
रामदेव र उनका चेला आचार्य बालकृष्ण मिलेर सन् २००६ मा पतञ्जलीको स्थापना गरेका हुन् । शुरुमा आयुर्वेदिक औषधि बनाउने कम्पनीबाट शुरु भएको यो समूहले अहिले विभिन्न सेगमेन्टका वस्तु तथा सामग्रीहरु उत्पादनमा हात हालेको छ ।
हालैका वर्षमा यसले भारतीय बजारमा कयौं बहुराष्ट्रिय एफएमसीजी कम्पनीहरुलाई समेत आच्छु - आच्छु पारेको छ । सन् २०१२ मा ५ अर्ब रुपया रहेको कम्पनीको आम्दानी सन् २०१६ सम्म आइपुग्दा १ खर्ब भारु पुगेको थियो । आउँदो पाँच वर्षमा कम्पनीको वार्षिक आम्दानी २ खर्ब रुपयामा पुर्याउने कम्पनीको लक्ष्य छ । एजेन्सी
