विराटनगर (अस) । मोरङ व्यापार संघले शुक्रवारदेखि आयोजना गरेको ‘ट्रेड एक्स्पो २०२२’मा आमउपभोक्ताको आकर्षण बनेका साहसिक खेलको शुल्क आधा घटाइएको छ । पहिले रिभर्स बन्जी, एयर साइक्लिङ र जिप लाइनको तीनओटैको प्याकेजमा प्रतिव्यक्ति १ हजार २०० रुपैयाँ शुल्क थियो । आयोजकका अनुसार अहिले यी सबैको शुल्क ६०० रुपैयाँ कायम गरिएको छ ।
उपभोक्ताबाट तीनओटै खेलको प्याकेजमा मूल्य घटाइनुपर्ने सुझाव आएपछि आधा घटाइएको अध्यक्ष नवीन रिजालले बताए । ‘सबैले खेल्न सकून् भन्ने उद्देश्यले शुल्कमा व्यापक छूट दिएका हौं,’ उनले भने । उनका अनुसार एउटा मात्र खेल खेल्न चाहनेले अब २०० रुपैयाँ मात्र तिरे पुग्छ ।
एक्स्पो शुरू भएको सातौं दिन बिहीवार थप १ करोड ५० लाख रुपैयाँ बराबरको कारोबार भएको छ । चारपांग्रे सवारीसाधन र विद्युतीय साइकलको विक्री तथा बुकिङ भएकाले एक्स्पोको कारोबार बढेको हो । बिहीवार २० हजारभन्दा बढीले एक्स्पोको अवलोकन गरेका छन् । बिहीवार सविन राई लगायतका गायकको प्रस्तुति थियो ।
संघका वरिष्ठ उपाध्यक्ष अनुपम राठीले साहसिक खेलहरू खेल्न टाढा र निकै दिनको यात्रा गरेर पुग्नुपर्ने भएकाले मेलामा आम सर्वसाधरणलाई आधा शुल्कमा यसको अवसर दिइएको बताए । जिपलाइन, रिभर्स बन्जी, जिप साइक्लिङ लगायत साहसिक खेल खेल्न विराटनगरवासीले धेरै टाढाको यात्रा नगरी एक्स्पोमै अनुभव लिन सक्नेछन् ।
एक्स्पोमा एसीसहितका ८०, कुलरसहितका ६० र सामान्य प्रकारका १०६ ओटा स्टल छन् । त्यस्तै अटोमोबाइलका १० र फुडकोर्टका लागि १० स्टल छन् । एक्स्पोमा दर्शकलाई मनोरञ्जन प्रदान गर्न आज (शुक्रवार) गायक डम्बर नेपाली, गायिका इन्दिरा जोशी र हास्यव्यंग्य कलाकार शैलेन्द्र सिम्खडाको प्रस्तुति रहेको छ ।
