चोभार सुक्खा बन्दरगाह दैनिक खाद्यवस्तु आयात गर्न प्रयोग नहोस् : अर्थमन्त्री

 चैत २२, काठमाडौं । अर्थमन्त्री जनार्दन शर्माले चोभार सुक्खा बन्दरगाह दैनिक उपभोग हुने खाद्यवस्तु आयातका लागि प्रयोग हुन नहुने बताएका छन् । मंगलवार चोभार सुक्खा बन्दरगाहको उद्घाटन कार्यक्रममा बोल्दैमन्त्री शर्माले तरकारी, फलफूल,खाद्यान्न लगायतका दैनिक उपभोग्य वस्तु आयातका लागि यो बन्दरगाहको उपयोग गर्न नहुने बताए । उनले यो बन्दरगाह निर्यातको केन्द्र बन्नु पर्ने पनि बताए । यो बन्दरगाह सञ्चालनमा आएपछि नेपाल स्थलमार्ग भएर समुन्द्री पहुँचमा जोडिएको बताउँदै उनले अब नेपालमा उत्पादित वस्तु समुन्द्री तटसम्म सिधै पुग्ने र त्यहाँबाट लोड भएका माल वस्तु सहजै काठमाडौं आइपुग्ने बताए । बन्दरगाह सञ्चालन पछि सडकमार्फत समुन्द्री तटसँग जोडियौं भन्दै उनले आयातको लागत घटाउन यसले ठूलो मद्दत गर्ने पनि बताए । आयातको तुलनामा वस्तु निर्यात निकै कमजोर रहेको भन्दै अर्थमन्त्री शर्माले नेपाली वस्तुहरु चोभार बन्दरगाह भएर निर्यात हुने गरी काम गर्न निजी क्षेत्रलाई आग्रह गरे । आयात घटाउन र निर्यात बढाउन सबै मिलेर काम गर्नु पर्ने भन्दै उनले सरकारले पनि आयात प्रतिस्थापनका लागि काम गरिरहेको बताए ।