रौतहट । श्रीराम सुगर मिल्स पुन: सञ्चालनको माग गर्दै आएका रौतहटका कृषकले संघर्ष समिति गठन गरेका छन् । उनीहरूले उखु उत्पादन संघ रौतहटका अध्यक्ष अशोकप्रसाद यादवको अध्यक्षतामा १०१ सदस्यीय संघर्ष समिति गठन गरेका हुन् । समितिले उद्योग मन्त्रालय, अर्थ मन्त्रालय र प्रधानमन्त्री कार्यालयमा ध्यानाकर्षण गर्ने र सोबाट सुनुवाइ नभए थप संघर्षका कार्यक्रम घोषणा गर्ने निर्णय गरेको संघर्ष समितिका अध्यक्ष यादवले बताए ।
मिल स्थापना गर्दा दीर्घकालसम्म सञ्चालनमा ल्याउने शर्र्तमा कृषकले सस्तो मूल्यमा जमीन विक्री गरेको उनको भनाइ छ । वर्षौं अघि मिललाई जमीन दिएर स्थापना गराएको र हाल मेशिन उपकरण लिलामी प्रक्रियाबाट विक्री गर्न थालेपछि कृषक निराश भएको उनले बताए । केही दिनअघि उद्योग परिसरमा आयोजित कृषक भेलामा अधिंकाश वक्ताले उद्योग पुन: सञ्चालनका लागि दबाब दिएका थिए ।
संघीय सांसद देवप्रसाद तिमल्सिनाले उद्योग पुन: सञ्चालनको विषय संसद्मा आफूले बारम्बार उठाएको र मिलका उद्योगपतिलाई कृषकसँग समन्वयका लागि आग्रह गरेको बताए । संघीय सांसद किरण साहले सडक र सदन दुवैबाट संघर्ष गरेर उद्योग सञ्चालनमा ल्याउन सहयोग गर्ने बताए । मधेश प्रदेशका ऊर्जा, सिँचाइ तथा खानेपानी राज्यमन्त्री शेख अबुल कलाम आजादले उद्योग सञ्चालनमा रहेका समस्यालाई मधेश प्रदेश सरकारले समाधानमा सहजीकरण गर्न तयार रहेको बताए । रौतहटको आर्थिक विकास मुख्य गरी किसानको समृद्धिको लागि चिनी मिल सञ्चालन हुनु आवश्यक रहेको उनको भनाइ छ । प्रदेश सांसद जितेन्द्र यादवले किसानको समृद्धि र भविष्यसँग जोडिएको विषय भएकाले उद्योग पुन: सञ्चालन हुनुपर्ने बताए ।
उद्योग व्यवस्थापनले २०७७ साउन ११ मा सूचना प्रकाशित गरी उद्योग स्थायी रूपले बन्द गरिएको जानकारी गराएको थियो । त्यसपश्चात् नेपाल बैंक लिमिटेडले उद्योगले साँवा र ब्याज नबुझाएको भन्दै सम्पूर्ण मेसिनरी पार्टपुर्जा टेन्डर प्रक्रियामार्फत विक्री गरिसकेको छ ।
