माघ २५, काठमाडौं । नेपाल लाईफ इन्स्योरेन्स कम्पनी लिमिटेडले यस वर्ष हालसम्मकै कम लाभांश प्रस्ताव गरेको छ । लाभांश वितरणको इतिहासमा १२६ दशमलव ३१ प्रतिशतसम्म वितरण गरेको कम्पनीले यस वर्ष कुल १४ दशमलव ७४ प्रतिशत लाभांश प्रस्ताव गरेको हो ।
कम्पनीले अघिल्लो आर्थिक वर्ष ०७६/७७ सम्मको सञ्चित मुनाफाबाट हाल कायम चुक्तापूँजीको आधारमा १४ प्रतिशत बोनस शेयर र कर प्रयोजनका लागि शून्य दशमलव ७४ प्रतिशत नगद लाभांश वितरणको प्रस्ताव गरेको हो ।
गत वर्ष कम्पनीले ३१ प्रतिशत बोनस शेयर र कर प्रयोजन समेतका लागि २० प्रतिशत नगद लाभांश वितरण गरेको थियो । यस वर्ष बीमा समितिले बीमा कम्पनीहरुलाई कर बाहेकको नगद लाभांश वितरणमा भने रोक लगाएको छ ।
जीवन बीमा कम्पनीहरुमध्यकै आकर्षक लाभांश वितरण गर्दै आएको नेपाल लाईफले यस वर्ष भने शेयरधनीहरुलाई निरास बनाएको छ । शेयरधनी डम्बरु बल्लब घिमिरेले यस वर्ष नेपाल लाईफको लाभांशबाट आफूहरु सन्तुष्ट नभएको बताए ।
सधै पेट भरि खाना खाने बानी परेको मान्छेहरुलाई आधा पेट मात्र खान दिदाँ कस्तो हुन्छ ? यो वर्ष नेपाल लाईफले पनि शेयरधनीहरुलाई त्यस्तै अवस्थामा पारेको भनाइ घिमिरेको छ । कम्पनीलाई सबल र सक्षम बनाई लगानीको उचित प्रतिफलका वितरण गनुपर्ने जिम्मेवारीबाट यो वर्ष भने नेपाल लाईफ चुकेको शेयरधनी घिमिरे बताउँछन् ।
पुरानो र विश्वासिलो कम्पनीको छबि जोगाउनका निम्ति पनि कम्पनीले विगतको लाभांश इतिहासलाई निरन्तरता दिनुपर्ने सुझाव उनको छ ।
कम्पनीले वितरण गरेको लाभांश इतिहासलाई फर्केर हेर्दा आर्थिक वर्ष ०६८/६९ को मुनाफबाट हालसम्मकै सर्वाधिक १२६ दशमलव ३१ प्रतिशत लाभांश वितरण गरेको तथ्यांक छ । उक्त वर्ष कम्पनीले ७० प्रतिशत बोनस शेयर र कर समेत ५६ दशमलव ३१ प्रतिशत नगद लाभांश वितरण गरेको थियो । त्यस पछिको आर्थिक वर्ष ०६९/७० मा पनि कम्पनीले ७० प्रतिशत बोनस शेयर र कर प्रयोजन समेतका लागि २८ दशमलव ५ प्रतिशत नगद लाभांश गरी कुल ९८ दशमलव ५ प्रतिशत लाभांश वितरण गरेको थियो ।
पछिल्ला पाँच वर्षको लाभांश इतिहासमा पनि कम्पनीले ७० दशमलव ५ प्रतिशतसम्म लाभांश वितरण गरेको अवस्था छ । आर्थिक वर्ष ०७३/७४ मा ४२ प्रतिशत बोनस शेयर र कर प्रयोजन समेत २८ दशमलव ५ प्रतिशत नगद लाभांश कम्पनीले वितरण गरेको हो ।
आर्थिक वर्ष ०७४/७५ मा भने कम्पनीले २५ प्रतिशत बोनस शेयर र कर प्रयोजनका लागि समेत २३ दशमलव ५ प्रतिशत नगद लाभांश कम्पनीले वितरण गरेको थियो । हाल कम्पनीको चुक्तापूँजी रू. ७ अर्ब १९ करोड ९९ लाख ७० हजार छ ।
दोस्रो त्रैमाससम्मको वित्तीय विवरण हालसम्म सार्वजनिक नगरेको कम्पनीको पहिलो त्रैमाससम्म जगेडा कोष रकम रू. ८६ करोड ९६ लाख ४८ हजार छ । पहिलो त्रैमाससम्म कम्पनीले रू. ७० लाख ३३ हजार खुद नाफा गरेको थियो । उक्त अवधिसम्म कम्पनीको कुल बीमाशुल्क आर्जन रकम रू. ९ अर्ब ९० करोडभन्दा बढी थियो ।
