फागुन १६, काठमाडौं । दक्षिण कोरियाली सामग्री प्रविधि कम्पनी, इन्नोसिएसआरले वातावारण मैत्री इंटा बनाउने प्रविधि विस्तार गर्ने भएको छ ।
यसकालागि कम्पनीले जे. बी. इको ब्रिक्स नेपालसँग सम्झौता गरेको छ । भक्तपुर, मकवानपुर र धादिङमा रहेका इंटा भट्टाबाट जे. बी. इको ब्रिक्सले हाल वार्षिक ५ करोड इंटा उत्पादन गर्दै आएको छ । कम्पनीले पोलेर परम्परागत प्रविधिबाट इंटा उत्पादन गर्दै आएको थियो । नयाँ प्रविधी प्रयोग सगै पोल्नुपर्ने झन्झट नहुने, जनशक्तिपनि कम लाग्ने तथा लागत समेत घट्ने छ ।
‘जनशक्ति र कोइला अभाव भएपछि मैले इंटा उत्पादनको लागि विकल्प खोजिरहेको थिएँ, सोहिक्रममा गुड ब्रिक्स सिस्टम फेला पारे, जुन प्रविधिले पोल्नु नपर्ने गरि इंटा उत्पादन गर्दछ’, जे. बी. इको ब्रिक्सका संचालक कृष्णमान भुजुले भने, ‘यसले नेपालमा देखिएको गुणस्तरीय इंटाको अभाव हटाउने छ भने नयाँ प्रविधिले इंटा उत्पादन प्रक्रियालाई सरल बनाउनुको साथै इंटाको गुणस्तर पनि बढाउँछ।’
नयाँ प्रविधिसँग काम गर्न तत्पर रहेको बताउँदै इन्नोसिएसआर र जे. बी. इको ब्रिक्सको सहकार्यले नेपालको इंटा उत्पादन उद्योगमा नयाँ आयाम आउने विश्वास समेत लिए ।
‘कोइलाको मूल्य निरन्तर बढ्दै जाँदा र जनशक्ति समेत अभाव हुँदा नेपालको इंटा उत्पादन उद्योगलाई समस्या भईरहेको छ । गुड ब्रिक्स सिस्टमले यसको समाधान दिदै वातावरण मैत्री प्रविधिबाट गुड सोइल स्टेबलाइजर प्रयोग गरि गुणस्तरीय ईंट्टा उत्पादन गर्नेछ, कम्पनीको विज्ञप्तीमा उल्लेख छ।
इन्नोसिएसआरले तयार पारेको गुड सोइल स्टेबलाइजर एउटा केमिकल हो, जसले अन्तरराष्ट्रिय स्तरको मापदण्ड पुरा हुने गरि इंटामा माटो र सिमेन्टको पकड बनाउन काम गर्छ । यस प्रविधिमार्फत हाइड्रोलिक मसिनको प्रयोग बाट उद्योग भित्रनै रहि हरेक सिजन इंटा उत्पादन गर्न सकिन्छ, यसले हरेक ईंट्टा मा समान गुणस्तर कायम हुन्छ ।
यस प्रविधिमा परम्परागत इंटा उत्पादनको तुलनामा १० प्रतिशत जनशक्ति र १० प्रतिशत मात्र जमिन आवश्यक पर्छ भने इंटालाई पोल्नु पनि नपर्ने बताईन्छ । इन्नोसिएसआरका प्रमुख कार्यकारी अधिकृत तथा संस्थापक साम युन्सुक लिका अनुसार गुड ब्रिक उत्पादन प्रविधि नेपालका इंटा उत्पादकहरु माझ लोकप्रिय छ ।
उनका अनुसार यस प्रविधिलेइंटा उत्पादन उद्योगमा देखिएका समस्या समाधान गर्नुका साथै अन्य थुप्रै फाइदा हुने व्यवसायीको विश्वास रहेको छ। उत्पादकलाई धेरै आम्दानी दिएको, ग्राहकलाई गुणस्तरीय इंटा उपलब्ध भएको तथा देशले स्वच्छ हावा पाएको छ । इन्नोसिएसआर प्रभावमुखी प्रविधिको शुरुवात गर्ने एक सामग्री प्रविधि फर्म हो ।