काठमाडौं । नगरकोटमा थप पर्यटकीय भौतिक संरचनाका काम धमाधम भइरहेको छ । यसका लागि काभ्रेपलाञ्चोकको मण्डनदेउपुर नगरपालिका र भक्तपुरको चाँगुनारायण नपाको सीमाक्षेत्रमा पर्ने नगरकोटमा दुवै जिल्लाका स्थानीय तहले आपसी समन्वयमा संरचना निर्माणमा तीव्रता दिएका छन् ।
नगरकोटको मुख्यचोक भट्टेडाँडामा निर्माणाधीन बसपार्क क्षेत्रमा चाँगुनारायण नगरको लगानीमा बसपार्क तथा पर्यटकीय सूचना केन्द्र, मण्डनदेउपुर नगरको बजेटबाट ‘सन–सेट पार्क’, झण्डा डाँडामा पार्कसहित ‘भ्यूज स्टेशन’ निर्माण र ९ करोड लागतमा १० लाख लिटरको दुई खानेपानी ट्यांकी निर्माण भइरहेको छ । थप पर्यटकीय संरचना निर्माणमा दुवै जिल्लाका सीमा क्षेत्रमा स्थानीय तहसँग नगरकोट–नाल्दुम पर्यटन विकास समितिले समन्वय गरिरहेको छ ।
टावरसम्म सडक बत्ती, नयाँ गन्तव्यमा थप संरचना बनाउन होटल व्यवसायीसँग छलफल भइरहेको समितिका सचिव प्रदीप अधिकारीले बताए । उनका अनुसार काभ्रेपलाञ्चोकतर्फ बनेपा नपा–२ मा हिलेजलजलेमा ताल निर्माणसँगै नगरकोट टावरसँग जिपलाइन र हाइकिङ–टे«ल निर्माण गरिने योजना बनाइएको छ । ‘पर्यटकलाई आकर्षण गर्ने मनोरञ्जन र मनोरम दृश्यलाई समेट्ने खालका योजना बनाउँदै छौं,’ अधिकारीले भने ।
हिलेजलजलेमा पर्यटकीय कृत्रिम ताल निर्माण गर्न चालू आर्थिक वर्षमा १८ करोड बजेट विनियोजन गरिएको छ । भक्तपुरबाट नगरकोट जाने करीब १७ किलोमिटर मुख्य सडक समयमै पक्की नभएकोमा स्थानीय व्यवसायीले गुनासो गर्दै आएका छन् । उक्त सडकको विकल्पका रूपमा हाल तेलकोटबाट हरिगुरु मार्गबाट आवतजावतका लागि निकै सजिलो भएको छ ।
करीब २ वर्षअघि नगरकोटस्थित सडक दायाँ–बायाँ सार्वजनिक जग्गामा वर्षौंदेखि बनाइएका टहरा हटाएपछि हाल नगरकोट भट्टेडाँडा बसपार्क निर्माण गरिने भएको छ ।
काभ्रेपलाञ्चोक र भक्तपुरको सीमा क्षेत्र चाँगुनारायण नपा–६ मा निर्माण गरिने बसपार्कको शनिवार नगरप्रमुख सोम मिश्रले शिलान्यास गरेका छन् । हाल ५ करोड ७ लाख ७६ हजार रुपैयाँ लागतमा १ वर्षमा बसपार्कको निर्माण गर्ने सम्झौता गरिएको उनले बताए ।
‘नगरकोट क्षेत्रलगायत चाँगुनारायण नगरका मुख्य क्षेत्रमा सार्वजनिक शौचालय पनि बन्नेछन्, जसको निःशुल्क सेवा उपलब्ध हुनेछ,’ उनले भने । उनका अनुसार नगरकोटमा समग्र बसपार्क क्षेत्र विकासका लागि ५५ करोड लाग्ने उनले बताए । बसपार्कका लागि ‘ड्रेनवाल’ निर्माण भइरहेको छ ।
नगरकोटमा साना–ठूला गरी १०० होटल छन् । करीब ७० प्रतिशत होटल काभ्रेपलाञ्चोकतर्फ पर्दछन् । यसमध्ये केही मात्रै चारतारे र तीनतारे स्तरका छन् । नगरकोटमा करीब दर्जन होटल निर्माणाधीन छन् भने त्यति नै संख्यामा निर्माण सम्पन्न भई सञ्चालनको तयारीमा रहेको बताइएको छ । रासस
