त्रिभुवन अन्तर्राष्ट्रिय विमानस्थलको सुधारको जिम्मा मलेसियन कम्पनीलाई दिइने भएको छ । नागरिक उड्डयन प्राधिकरणले मलेसियन एयरपोर्ट होल्डिङ वरहडलाई विमानस्थल सञ्चालनसम्बन्धी सम्पूर्ण अवस्था सुधार गर्ने जिम्मा दिन लागिएको जानकारी प्राधिकरणका महानिर्देशक केशव खनालले दिए । उनका अनुसार सो कम्पनीले विमानस्थलको प्रारम्भिक अवस्थाको अध्ययन गरिसकेको छ । अहिले नियामक र सेवप्रदायक दुवैको भूमिका आफैले गरिरहेको प्राधिकरणलाई फुटाएर दुईवटा छुट्टाछुट्टै संस्था बनाउने उहकार्य सुरू गरिएको जानकारी पनि खनालले दिए । त्यसपछि नियामक र उडान सम्बद्ध सेवा प्रदायकका लागि अलग अलग संस्था बन्नेछन् ।
नेपाल अनलाइनको एसएमएस सेवा बन्द
नेपलमा अनलाइनद्वारा विगत ७ वर्षदेखि सञ्चालित नि:शुल्क सन्देश प्रवाह गर्ने ग्लोबल एसएमएस गेट वे टु नेपालले फ्री मेसेजिङ सर्भिस टु नेपाल सेवा बन्द गरेको छ ।
नि:शुल्क भएका कारण अनावश्यक तथा भ्रामक, अपमानजनक र धम्कीपूर्ण सन्देशहरूसमेत प्रवाहित भएका कारण समाजमा विकृति बढेको भन्दै सेवा बन्द गरिएको संस्थाद्वारा जारी प्रेस विज्ञप्तिमा उल्लेख गरिएको छ । अर्को सूचना जारी नभएसम्मका लागि नि:शुल्क सेवा बन्द गरेको बताउँदै संस्थाले शुल्क तिर्ने सेवामा भने आधा शुल्क लिएर सेवा सुचारू गरिरहेको बताएको छ ।
वर्ष ५, अंक २४, २०६६, फागुन ३
