काठमाडौं । बहुपक्षीय कर्जादाता निकाय अन्तरराष्ट्रिय मुद्रा कोष (आईएमएफ)ले युक्रेनलाई साढे १५ अर्ब डलरभन्दा धेरैको कर्जा दिने भएको छ ।
रुसको आक्रमणपछि आईएमएफले पहिलो पटक युक्रेनलाई १५ अर्ब ६० करोड डलर (झन्डै १२ अर्ब ८० करोड पाउन्ड) कर्जा दिने भएको हो । कर्जा केही दिनभित्रै पारित हुने आशा गरिएको छ । रुसको आक्रमणयता युक्रेनले पाउन लागेको यो सबैभन्दा ठूलो मध्येको एउटा ऋण हो ।
आईएमएफले हालै मात्रै अति नै उच्च अनिश्चयको सामना गरिरहेका देशहरूलाई कर्जा दिन आफ्नो नियममा परिवर्तन गरेको थियो । रुसले युक्रेनमाथि आक्रमण जारी राख्दै त्यहाँको अर्थतन्त्र चौपट भएको छ । सन् २०२२ मा युक्रेनी अर्थतन्त्र ३० प्रतिशतले खुम्चिएको थियो । ठूलो संख्यामा पूर्वाधारहरू ध्वस्त भइरहेका छन् भने गरिबीको स्तर पनि अकासिएको आईएमएफले एउटा विज्ञप्तिमा भनेको छ ।
युक्रेनलाई सात औद्योगिक देशहरूको समूह जी-सेभेन र यूरोपेली संघ (ईयू) समेतका दाताहरूले ठूलो आर्थिक सहयोग र आश्वासन दिइरहेका छन् । अन्तरराष्ट्रिय दाता र साझेदारहरूबाट युक्रेनका लागि भारी छूटमा रकम जुटाउन पनि सहमति भएको बताइएको छ । यसबारे आईएमएफका अधिकारी ग्याभिन ग्रेले थप विवरण भने दिएका छैनन् । आईएमएफले दिने भएको कर्जालाई उसको कार्यकारी समितिले पारित गर्नु पर्नेछ । यो वर्ष युक्रेनी अर्थतन्त्र थोरैले खुम्चने वा बढ्ने आईएमएफको अनुमान छ ।
यो रकमले युक्रेनको सबै पूँजीगत खर्च धान्ने र बृहत् आर्थिक स्थायित्व सुनिश्चित गर्ने आशा गरिएको छ । हालैका हप्ताहरूमा जी-सेभेनका शीर्ष नेताहरू एक पछि अर्को गर्दै युक्रेन भ्रमणमा गइरहेका छन् । रुसको आक्रमणयता अमेरिकाले युक्रेनमा पैसाको खोलो बगाइरहेको छ । सैन्य सहायताहरूमा पनि भारी वृद्धि गरेको छ । गएको वर्षयता विश्वभरबाट युक्रेनले सहायता पाइरहेको छ । एजेन्सी
