नयाँ दिल्ली (भारत) । भारतले पछिल्लो १३७ दिनसम्म डिजेल पेट्रोलको मूल्य नबढाउँदा करीब २ खर्ब भारतीय रुपैयाँ घाटा खाएको अनुमान गरिएको छ ।
सरकारले नोभेम्बर देखि १३७ दिन सम्म दैनिक मूल्य संसोधन ठप्प पार्दा मुख्य खुद्रा तेल विक्रेताहरु इन्डियन आयल कर्पोरेशन (आईओसी), भारत पेट्रेलियम र हिन्दुस्तान पेट्रोलियमले १ खर्ब ९० अर्ब रुपैयाँ भन्दा धेरै गुमाएको मूडिजको इन्भेष्टर्स सर्भिसले हालै बताएको छ ।
विश्व बजारमा कच्चा तेलको भाउ ११० देखि १२० डलरबीच रहँदा भारतमा पेट्रोल र डिजेलको भाउ क्रमशः १३ रुपैयाँ १० पैसादेखि २४ रुपैया ९० पैसा र १० रुपैयाँ ६० पैसादेखि २२ रुपैया ३० पैसासम्म बढाउनु पर्ने विश्लेषकहरुले बताएका छन् ।
कच्चा तेलको भाउ औसत सय डलरमा रह्यो भने प्रति लिटर डिजेल पेट्रोलको भाउ ९ देखि १२ रुपैयाँ बढाउन पर्छ भनेर क्रिसिल रिसर्चले बताएको छ । औसत मूल्य ११० देखि १२० डलरबीच रहँदा भने यो वृद्धि १५ रुपैयाँदेखि २० रुपैयाँसम्म हुन सक्ने अनुमान क्रिसिलको छ ।
भारतले १३७ दिनसम्म मूल्य संसोधन ठप्प पारेपनि नेपाललाई बेचिएको तेलको मूल्य भने आईओसीले बढाएरै पठाएको थियो । त्यसैले नेपालमा पठाइने तेलको भाउ सोही स्तरमा बढ्ने भने छैन । यद्यपि, विश्व बजारमा कच्चा तेलमा हुने घटबढअनुसार केही थपघट भएर चाँहि आउनेछ ।
९ दिनमा ६.४० भारू मूल्य वृद्धि
भारतले हालैका दिनमा धमाधम पेट्रोलियम पदार्थको भाउ बढाइरहेको छ । गएको १० दिनमध्ये ९ दिनमा डिजेल र पेट्रोलको भाउ ६ रुपैयाँ ४० पैसा भारू बढाएको छ । बुधबार पनि त्यहाँका सरकारी तेल कम्पनीहरुले डिजेल र पेट्रोलको भाउ ८०/८० पैसा बढाएका छन् । यो विगत १० दिनमध्ये ९ औं दैनिक वृद्धि हो ।
पछिल्लो मूल्य वृद्धिसँगै दिल्लीमा पेट्रोलको खुद्रा मूल्य प्रतिलिटर १०१ रुपैयाँ ८१ पैसा कायम भएको छ । डिजेलको भाउ पनि लिटरको ९३ रुपैयाँ ७ पैसा कायम भएको छ ।
अहिले भारतीय बजारमा विश्व बजारको तुलनामा पेट्रोलियम पदार्थको भाउ २० देखि २२ रुपैयाँ कम छ । सो अन्तर कम गर्न खुद्रा विक्रेताहरुले धमाधम भाउ बढाइरहेका न् । तेलको भाउ अहिले पनि विश्व बजारमा ११० डलरभन्दा माथि छ । हालैका दिनमा गरिएको मूल्य संसोधनले सो अन्तरको थोरै मात्रै भरपाई गरेकोले थप मूल्य वृद्धि हुने देखिएको छ । एजेन्सी