काठमाडौं। लक्ष्मी सन्राइज बैंकले ‘स्पार्क २४ : इम्पावरिङ उमन इन लिडरशीप–इन्स्पाएर इन्क्लुजन’ कार्यक्रम गरेको छ । समावेशिता, समानता र सशक्तीकरणको संस्कृति प्रवर्द्धन गर्ने आफ्नो प्रतिबद्धतालाई आत्मसात् गर्दै बैंकले उक्त कार्यक्रम गरेको बताइएको छ ।
कार्यक्रममा राष्ट्रिय मानवअधिकार आयोगका सदस्य लिली थापा, अन्तरराष्ट्रिय मुद्रा कोषका आवासीय प्रतिनिधि टेरेसा दबान सान्चेज, एफ वान सफ्ट ग्रुपका पियुष पौड्याल र भायनेट कम्युनिकेसन्सकी प्रमुख कार्यकारी अधिकृत सेवा पाठक लगायतका वक्ताले महिला नेतृत्व र सशक्तीकरणको बारेमा धारणा राखेका थिए ।
कार्यक्रममा बैंकका प्रमुख कार्यकारी अधिकृत अजयविक्रम शाहले बैंकका महिला कर्मचारीको व्यावसायिक विकास तथा मानसिक एवं शारीरिक स्वास्थ्य सुनिश्चित गर्न बैंक प्रतिबद्ध रहेको बताए । उनले महिलालाई व्यक्तिगत र व्यावसायिक रूपमा सक्षम बनाउने वातावरण निर्माण गर्न बैंक प्रयत्नशील रहेको बताए । उत्पीडन र भेदभावका मामलामा शून्य सहनशीलता कायम गर्ने नीतिमार्फत सबैका लागि मनोवैज्ञानिक रूपमा सुरक्षित र सम्मानजनक कार्यस्थल बनाउन बैंक प्रतिबद्ध रहेको उनको भनाइ थियो ।
कार्यक्रममा लैगिंक समावेशिता, समानता र सशक्तीकरण झल्काउने ‘आधुनिक मिथिला पेन्टिङ’ पनि बनाइएको थियो ।
