दार्चुला सदरमुकाम खलंगा क्षेत्रको महाकाली नदी किनारबाट बालुवा निकाल्न रोक लगाइएको छ । महाकाली नदी नियन्त्रण आयोजनाले तटबन्धको छेउछाउबाट बालुवा झिक्ने काम नगर्न सूचना जारी गरेको छ ।
नदी नियन्त्रण आयोजनाले पटकपटक तटबन्धको संरचना क्षेत्रबाट मनोमानी ढंगले बालुवा थुपार्ने, ढुङ्गा गिट्टी उत्खनन गर्ने÷गराउने काम नगर्न अनुरोध गरेपनि नदी जन्य स्रोतको दोहन रोकिएको छैन् । जेसेवि, एस्काइभेटर र ट्याक्टरहरु नदी किनार सम्म लगेर बालुवा थुपार्ने, ढुङ्गा गिट्टी उत्खनन गर्ने कार्यहरुले निर्माणधिन तटबन्धमा क्षती भइरहेको महाकाली नदी नियन्त्रण आयोजना दार्चुलाका प्रमुख शोभाकर पौडेलले बताउनुभयो । तटबन्ध संरचनालाई असर पर्ने ढंगले नदीजन्य स्रोतको दोहन गरेको पाइएमा प्रचलित कानुन बमोजिम कारवाही गरिने उहाँको भनाई छ ।
