रहुघाट जलविद्यत् आयोजनाका लागि उपलब्ध गराएको ऋण ३ वर्षसम्म पनि खर्च नभएकोमा भारत असन्तुष्ट देखिएको छ । ‘ऋण सम्झौता भएको झण्डै ३ वर्ष भइसक्यो तर विद्युत् प्राधिकरणले आयोजनामा अहिलेसम्म एक रुपैयाँ पनि खर्च गर्न नसकेकाले भारत असन्तुष्ट भएको हो,’ रहुघाट आयोजनाका प्रमुख राजीव शर्माले अभियानसँग भने । ‘भारतीय सहयोगमा बन्ने आयोजनाको काम नियतवश अघि बढाउन नचाहने कर्मचारीतन्त्रका कारण अहिलेसम्म सहयोग रकम खर्च हुने गरी काम अगाडि नबढेको हो,’ भारतीय राजदूतावास स्रोतको आरोप छ । ३० मेगावाट क्षमताको रहुघाट नेपाल विद्युत् प्राधिकरणले विकास गर्न लागेको आयोजना हो । ऊर्जा मन्त्रालयका एक उच्च अधिकारी भन्छन्, ‘सहयोग खर्च गर्न नसक्नु हाम्रा लागि नोक्सानी हो । उल्टै दाताले असन्तुष्टि व्यक्त गर्नुपर्ने स्थिति आउनु लाजमर्दो कुरा हो ।’
वर्ष ६, अंक ९८, मंगलवार, १३ पुस, २०६७
