काठमाडौं । नेपालका विभिन्न ३१ ओटा कम्पनी तथा उद्योगले विदेशी कम्पनीको ट्रेडमार्क नक्कल गरेपछि उद्योग विभागले कानून शाखामा उपस्थित हुन उनीहरूलाई सातदिने अल्टिमेटम दिएको छ । विभागमा ३१ ओटा विदेशी कम्पनीले आफ्ना उत्पादनको ट्रेडमार्क नेपाली कम्पनीले नक्कल गरेको भन्दै उजुरी दिएका हुन् ।
भारत, अमेरिका, फ्रान्स, थाइल्याण्डलगायत देशमा रहेका ती कम्पनीले उद्योग विभागमा उजुरी दिएपछि विभागले उक्त समयावधिमा ती कम्पनीलाई उपस्थित हुन आग्रह गरेको हो ।
विभागका अनुसार कम्पनीहरूले विभिन्न समयमा उजुरी गरेका हुन् । विदेशी कम्पनीले दिएको उजुरीका आधारमा विभागले ट्रेडमार्क नक्कल गर्ने स्वदेशी उद्योगसँग लिखित प्रतिक्रिया मागेको भए पनि कुनै प्रतिक्रिया उपलब्ध नभएको उल्लेख गरेको छ ।
सूचना प्रकाशन गरेको ७ दिनभित्र लिखित प्रतिक्रिया प्राप्त नभए कानून बमोजिम कारबाही हुने र पछि कुनै पनि उजुरी नलाग्ने विभागले बताएको छ । ट्रेडमार्क नक्कल गरेको आरोपमा अमेरिकाको पीपीजी आर्किटेक्चरल फिनिस इन्क, भारतको भारती एयरटेल लिमिटेड, भारत पश्चिम बंगालको एमामी लिमिटेड, थाइल्याण्डको टीसी फर्मास्युटिकल इन्डष्ट्रिजलगायतले विभागमा उजुरी दिएका छन् ।
विभागले जारी गरेको सूचनाअनुसार ट्रेडमार्क नक्कल गरेका र लिखित जवाफ माग गरिएका स्वदेशी कम्पनीमा किङ्सवुड कलर, सूर्य फुड एण्ड बेभरेज, बारा फुड एण्ड बेभरेज, एएनसी इभेन्ट म्यानेजमेन्ट, पाठक खाद्य मसला उद्योग, नेपाल फुड प्रोसेसिङ एण्ड प्याकेजिङ लगायत उद्योग छन् ।
