दाङमा हरियाली प्रवद्र्धनसँगै भूक्षय नियन्त्रणका लागि चार लाखभन्दा बढी बिरुवा रोप्न थालिएको छ । डिभिजन वन कार्यालय घोराही र लमही अन्तर्गत यस वर्ष जिल्लाका विभिन्न सामुदायिक वन, निजी वन, नदी उकास क्षेत्रलगायतका विभिन्न क्षेत्रमा चार लाख ६० हजार बिरुवा रोप्न थालिएको हो । सामुदायिक वन समूहमा हरियाली प्रवर्धनसँगै वातावरण संरक्षण, भूक्षय नियन्त्रण र काठ उत्पादनका लागि डिभिजन वन कार्यालय घोराही अन्तर्गत दुई लाख ७० हजार र डिभिजन वन कार्यालय लमही अन्तर्गत एक लाख ९० हजार बिरुवा रोप्ने तयारी गरिएको छ । डिभिजन वन कार्यालय घोराहीका प्रमुख मोहन श्रेष्ठले वन समूहको खाली जग्गामा वृक्षरोपण गरेर हरियाली प्रवर्धनसँगै बाढी वातावरण संरक्षणका लागि बिरुवा रोप्न थालिएको जानकारी दिनुभएको छ । उहाँका अनुसार घोराही, अम्बापुर र पुरन्धरामा रहेका नर्सरीमा बिरुवा तयार रहेका छन् ।
