काठमाडौं (अस) । गत आर्थिक वर्ष २०७७/७८ मा रू. ४ अर्ब ९६ लाख बराबरको प्याज आयात भएको छ । विगत १३ वर्षको तथ्यांकको विश्लेषण गरी हेर्दा यस अवधिमा प्याज आयातको औसत वार्षिक वृद्धिदर करीब ३१ प्रतिशत रहेको छ । कृषि श्रमिकको कमी, प्याज खेतीयोग्य कृषि भूमिको विनाश, बढ्दो भूमि मूल्य, ठूला कृषकलाई शोषक–सामन्त भन्दै असुरक्षा उत्पन्न गर्ने राजनीतिक प्रवृत्ति, ग्रामीण क्षेत्रमा बढ्दो असुरक्षा तथा अराजकता र कृषिमा ठूलो अनुदानयुक्त मुलुकको प्याज उत्पादन रणनीतिका कारण स्वदेशमा माग बमोजिम प्याज उत्पादन हुन नसक्दा आयातमा यस प्रकारको वृद्धि देखिएको हो । उक्त परिस्थितिलाई दृष्टिगत गर्दै प्याज उत्पादनमा सही रणनीति अवलम्बन गर्ने हो भने मुलुक केही वर्षभित्रै यो उत्पादनमा आत्मनिर्भर हुन सक्छ । यहाँ प्रस्तुत तथ्यांकले प्याजखेतीमा व्यावसायिक लगानीको उज्ज्वल सम्भावना रहेको पुष्टि हुन्छ । यसका लागि सरकारले उचित वातावरण सृजना गर्नु आवश्यक देखिन्छ ।
