काठमाडौं । नेप्से परिसूचक गत आइतवारयता लगातार चार दिन वृद्धि भएको छ । चार कारोबार दिनमा परिसूचक ३ दशलमव ८ प्रतिशत वृद्धि भएको हो ।
बजार बढ्दा लगानीकर्ताको आकर्षण बैकिङ्ग समूहमा परेको छ । अरु कपितय समूहरुमा करेक्सन भइरहँदा बैंकिङले बजारलाई बढ्न टेवा पुर्याएको हो ।
अधिकांश बैंकहरूको शेयर मूल्य अहिले पनि २ सय रुपैयाँभन्दा तल छ । सोही कारण लगानीकर्ताको लागि तुलनात्मक रूपमा सुरक्षित क्षेत्र हुन सक्छ । वाणिज्य बैंकहरूको शेयर मूल्य निकै सस्तो र चौथो त्रैमासको वित्तीय विवरण सकारात्मक आउन सक्ने अपेक्षाले पनि लगानीकर्ता यसतर्फ लागेको देखियो ।
साताको चौथो कारोबार दिन बुधवार नेप्से परिसूचक शून्य दशमलव ५२ प्रतिशत वृद्धि भएको छ । नेप्से परिसूचक २ हजार १६५ दशमलव २४ विन्दुमा पुगेको हो । यस दिन सेन्सेटिभ इन्डेक्स शून्य दशमलव ८२ प्रतिशत, फ्लोट इन्डेक्स शून्य दशमलव ७१ प्रतिशत र सेन्सेटिभ फ्लोट इन्डेक्स १ दशमलव ०४ प्रतिशत वृद्धि भएको छ ।
कारोबारमा आएका २६० धितोपत्रको ८६ लाख ७४ हजार १०९ कित्ता शेयर ५१ हजार ४४५ पटकमा रू. ३ अर्ब ३४ करोड बराबरको कारोबार भएको छ । बुधवार कारोबारमा आएका धितोपत्रमध्ये सबैभन्दा बढी बिपि डब्लु लघुवित्त वित्तीय संस्थाको शेयर मूल्य १० प्रतिशत वृद्धि भएको छ । कम्पनीको शेयर मूल्य प्रतिकित्ता रू. १ हजार ४९० दशमलव ७० पुगेको हो । यस्तै विशाल बजार कम्पनीको शेयर मूल्य ७ दशमलव १६ प्रतिशत बढेर रू. ३ हजार ७२९ पुगेको छ ।
बुधवार एनआईबिएल समृद्धि फण्ड २ का इकाईधनीहरूले धेरै गुमाएका छन् । फण्डको इकाई मूल्य ९ दशमलव ६४ प्रतिशत घटेको छ । फण्डको इकाई मूल्य रू. ८ दशमलव ०६ मा झरेको छ । त्यस्तै १२ % गुडवील फाइनान्स लिमिटेड डिबेञ्चर २०८३ नामक ऋणपत्रको मूल्य ७ दशमलव ७३ प्रतिशत घटेर रू. १ हजार ३८ मा कायम भएको छ ।
सर्वाधिक शेयर खरीदविक्रीको हिस्सा युनाइटेड अजोड इन्स्योरेन्स कम्पनीले ओगटेको छ । कम्पनीको रू. २३ करोड ५७ लाख बराबरको शेयर किनबेच भएको हो । यस कम्पनीको शेयर मूल्य प्रतिकित्ता रू. ६३१ पुगेको छ । सर्वाधिक शेयर खरीदविक्री हुने कम्पनीको सूचीमा दोस्रोमा एनआईसी एशिया बैंक छ । कम्पनीको रू. १४ करोड ७० लाख बराबरको शेयर खरीदविक्री भएको हो ।
यस दिन कारोबारमा आएका १३ समूहगत परिसूचकमध्ये पाँच समूहको परिसूचक बढेको छ भने बाँकी सबै समूहको परिसूचक घटेको छ । बुधवार सबैभन्दा बढी व्यापार समूहको परिसूचक ४ दशमलव ८३ प्रतिशत वृद्धि भएको छ । त्यस्तै बैंकिङ्ग समूहको परिसूचक २ दशमलव ३१ प्रतिशत वृद्धि भएको छ । समूहगत परिसूचक घट्नेमा सबैभन्दा बढी अन्य समूहको परिसूचक शून्य दशमलव ९६ प्रतिशत घटेको छ ।
