धार्मिक पर्यटक भित्र्याउने लक्ष्यसहित बुद्धिष्ट सर्किट नामक पर्यटन भ्रमण योजना सार्वजनिक गरिएको छ । नेपाल पर्यटन वर्ष २०११ लाई लक्षित गरी ल्याइएको यस योजनामा पर्यटकलाई बुद्धको जीवनका महत्वपूर्ण पक्षहरू जोडिएका नेपाल तथा भारतका विभिन्न स्थानको भ्रमण गराइने छ । ‘नेपालमा धेरै वर्ष अघिदेखि बुद्धिष्ट पर्यटनको प्रवद्र्धनमा व्यवसायीले आवाज उठाउँदै आए पनि सरकारले यसमा पहल गर्नसकेको थिएन । अहिले लामो गृहकार्यपछि योजना सार्वजनिक गरिएको छ,’ पर्यटन व्यवसायी तथा हिमालय एक्सपिडिसनका संस्थापक विक्रम पाण्डेले बताए ।
उक्त भ्रमण लुम्बिनीबाट शुरू भई कुशीनगर, सारनाथ, बोधगया, वैशाली हुँदै लुम्बिनीमा आएर टुंगिने बताइएको छ । नौ दिने उक्त भ्रमण प्याकेजको नाम इनलाइटमेन्ट एक्सप्रेस राखिएको छ । यसबाट नेपाली पर्यटनमा ठूलो योगदान पुग्ने पाण्डेले बताए । उनका अनुसार सर्किटको माध्यमबाट प्रतिवर्ष ३ लाख पर्यटक नेपाल भित्र्याउन सकिनेछ । यो यात्रामा आउने पर्यटकमध्ये कम्तीमा १ लाखले एक दिनमात्रै लुम्बिनीमा बिताउँदा पनि प्रतिपर्यटक ३० डलरका हिसाले ३० लाख डलर आम्दानी गर्न सकिने पाण्डे बताउँछन् ।
नेपाल पर्यटन बोर्डका प्रमुख कार्यकारी अधिकृत प्रचण्डमान श्रेष्ठले बुद्धिष्ट सर्किट नेपाली पर्यटनमा नयाँ र उपयुक्त प्रडक्ट बन्ने विश्वास व्यक्त गरे । बोर्डले गर्ने पर्यटकीय योजनाको प्रवर्द्धन र मार्केटिङमा बुद्धिष्ट सर्किटलाई समेत समेट्ने छौं,’ श्रेष्ठले भने ।
वर्ष ५, अंक ४३, २०६७, असार १४– २०
