फागुन ३, काठमाडौं । सहरी विकास मन्त्री रामकुमारी झाँक्रीले सहरी पूर्वाधार विकास ऐन ल्याउने तयारी भइरहेको बताएकी छन् ।
व्यवस्थित वस्ती विकास गर्न ऐनको अभाव भएकोले संसदको आगामी अधिवेशनमा विधेयक पेश हुने पनि मन्त्री झाँक्रीले बताइन् ।
नगर विकास कोषको ३४ औं वार्षिकोत्सवका अवसरमा मन्त्री झाँक्रीले सहरको विकास हुँदै गर्दा व्यवस्थित बसोबासलाई प्राथमिकतामा राखेर विज्ञको सुझावमा ऐन निर्माणका क्रममा रहेको बताइन्।
मन्त्रालयमा ५ लाखदेखि १ अर्ब रुपैयाँसम्मको योजनाका लागि बजेटको माग भइरहेको उल्लेख गर्दै उनले योजनालाई प्रथामिकतमा राखेर काम गर्नुपर्ने बताइन्। राजनीतिक स्वार्थ र भोट बैंकका लागि पालिकाहरुले मन्त्रालयसम्म आएर आयोजना माग गर्ने गरेको बताउँदै उनले त्यस्ता कार्यलाई मन्त्रालयले कदापि स्वीकार नगर्ने बताइन् ।
चुनाव नजिकिंदै गर्दा मतदातालाई खुशी पार्न माग हुने गरेका आयोजनालाई स्वीकृती नगर्दा आफ्नै पार्टिमा पनि आलोचना हुने गरेको उनले बताइन् । करीब चार महीनाको अवधिमा विभिन्न नगर विकासका लागि १६ अर्ब रुपैयाँको योजना दर्ता भएको जानकारी दिइन् ।
‘मैले मन्त्रालय सम्हालेको चार महीनामा सांसद र पूर्व मन्त्रिसहितको सिफारिसमा १६ अर्ब रुपैयाँका योजना माग भएको छ, यो गलत हो, विकास त प्राथमिकताका रुपमा क्रमिक रुपले हुनुपर्छ’, उनले भनिन्।
त्यस्तै नगर विकास कोषलाई निगमको रुपमा स्थापना गरि लगानी बढाउने समेत उनले उल्लेख गरिन् । मन्त्री झाँक्रीले नगर विकास कोष अझ सुदृढ हुन आवश्यक रहेको बताइन्।
कार्यक्रममा मन्त्रालयका सचिव मणिराम गेलालले नगरपालिकालाई वित्तीय तथा प्राविधिक सहयोग उपलब्ध गराउन कोष क्रियाशील रहेको बताए ।
कार्यक्रममा प्राकृतिक स्रोत बाँडफाँड तथा वित्त आयोगका अध्यक्ष बालानन्द पौडेल, नेपाल नगरपालिका महासंघका अध्यक्ष अशोक व्याञ्जुलगायतले स्थानीय तहको विकासमा उपभोक्ता समिति र कोष बीच समन्वयको खाँचो औंल्याएका थिए ।
कोषका कार्यकारी निर्देशक कृष्णप्रसाद सापकोटाले चालु आवमा देशका विभिन्न ८८ नगरपालिकासँग सहकार्य गरी करीब ५ अर्ब रुपैयाँको योजना कार्यान्वयनको अवस्थामा रहेको जानकारी दिए । सापकोटाले काठमाडौमा विद्युतीय सवारी सञ्चालनदेखि व्यवस्थित पार्किङ निर्माण गर्ने चरणमा नगर विकास कोष रहेकोसमेत जानकारी दिए ।
वार्षिकोत्सवको अवसरमा कोषले उत्कृष्ट नगरपालिका, खानेपानी उपभोक्ता संस्था र उत्कृष्ट कर्मचारीलाई पुरस्कृत गरेको थियो । नगरपालिकातर्फ पुस्कृत हुनेमा मकवानपुरको हेटौंंडा उपमहानगरपालिका, सर्लाहीको हरिवन नगरपालिका रहेका छन् भने खानेपानी उपभोक्ता संस्थातर्फ सितलपाटी खानेपानी उपभोक्ता संस्था र बिर्तामोड खानेपानी उपभोक्ता संस्था रहेका छन् । त्यस्तै कर्मचारीतर्फ कोषका अधिकृत मानबहादुर पुन र वरिष्ठ सायक हरकुश बोहोरा सम्मानित भएका छन् ।
