जेठ १६, विराटनगर ।निजी क्षेत्रका व्यक्तित्वहरुले आगामी आर्थिक वर्ष २०७८/ ७९ को बजेट समग्रमा राम्रो रहेको प्रतिक्रिया दिएका छन् ।
अर्थमन्त्री विष्णुप्रसाद पौडेलले शनिवार सार्वजनिक गरेको बजेटबारे प्रतिक्रिया दिंदै विराटनगरका उद्योगी व्यवसायीहरुले बजेट सकारात्मक भए पनि कार्यान्वयनमा भने चुनौती रहेको भन्दै मिश्रित प्रतिक्रिया दिएका छन् ।
सुयसराज प्याकुरेल, उद्योग संगठन मोरङ अध्यक्ष
स्रोतको विश्वास नियतमा प्रश्न उठाउने ठाउँ छ । १६ खर्ब रुपैयाँको बजेटमा १० खर्ब रुपैयाँ राजस्वबाट उठ्ने र ६ प्रतिशत आर्थिक वृद्धि हुने कुरामा अलिक तालमेल मिल्दैन । कच्चा पदार्थ र फिनिस गुडमा लाग्ने करमा दुई तहको फरक हुनु पर्छ भन्ने हाम्रो मागलाई एक तहको फरक पर्ने व्यवस्था भएको छ त्यो स्वागत योग्य छ । कोभिडको कारण भएको लकडाउनको अवधिको विद्युत् डिमाण्ड शुल्क मिनाहा, सामाजिक सुरक्षा कर लागू भएको उद्योगहरुको सरकार आफैंले बन्दको अवधिको व्यहोर्ने माग अनुसारको सम्बोधन भएको छ त्यो राम्रो पक्ष हो । डिजेलमा भ्याट रिफन्ड दिने ब्यवस्था पनि राम्रो छ । यो अगाडी नै कार्यान्वयन हुनुपथ्र्यो तर ढिलै भएपनि सम्बोधन भयो । व्यवसायको स्टार्टअपको लागि २५ लाख रुपैयाँ विनाधितो ऋण दिने र ५ प्रतिशत ब्याजमा नै दिने र कर छूट हुने व्यवस्थाले नयाँ उद्यमी व्यवसायीहरु थपिने संभावना छ यो सरकारले ल्याएको नीति स्वागत योग्य छ । स्वास्थ्य केन्द्रित बजेट भएकाले विकासमा सबै क्षेत्र समेटिन सकेको छैन । सुनसरीको अमडुवाको औद्योगिक क्षेत्रको विकासको अध्ययन गर्ने भनेर चार पटक बजेट बिनियोजन भइसक्यो त्यो कार्यान्वयन हुन सकेको छैन । त्यस्तै विराटनगर विमानस्थलको विस्तारमा बजेट मौन छ । टर्मिनल निर्माणमा मात्र बजेट परेको छ । स्वदेशी उत्पादन प्रर्वदनका लागि आएको कार्यक्रम राम्रो छ ।
प्रकाश मुन्दडा, अध्यक्ष, मोरङ व्यापार संघ
बजेट राम्रो आएको छ । हामीहरुले उठाउदै आएका मागहरु पनि सम्बोधन भएका छन । डिजेलमा लाग्दै आएको भ्याट रिफन्ड हुने भएको छ। त्यस्तै अमडुवामा निर्माण हुने भनिएको औद्योगिक क्षेत्रको अध्ययनका लागि बजेट छुट्टिएको छ । त्यसै गरि विराटनगरमा प्रदेश स्तरको प्रर्दशनी स्थल निर्माणका लागि पनि बजेट आएको छ । त्यो स्वागत योग्य छ । औद्योगिक व्यवसायको क्षेत्रमा बजेटले यो पटक निकै राम्रोसंग समेट्न खोजेको छ । स्टार्टअप विजनेशलाई प्रोत्साहन गरिउको छ । इन्टरटेन्टमेन्ट उद्योगको नविकरण र आयकर छुटको ब्यवस्था राम्रो छ । कुल गार्हस्थ उत्पादन ६ प्रतिशतभन्दा माथि जाने लक्ष्य चुनौति पूर्ण छ । यदि दुई महीना भित्रमा आधाभन्दा बढी जनसंख्यालाई खोप लगाउन सकियो भने जीडीपीको लक्ष्य भेट्टाउन मुस्किल हुदैन ।
