विराटनगर । महिलालाई उद्यमशीलतमा आकर्षित गर्न सरकारका विभिन्न निकायबाट प्रदान गरिएका सुविधामा पहुँच सुनिश्चित हुने वातावरण बन्नुपर्ने माग गरिएको छ ।
उद्योग संगठन मोरङले आयोजना गरेको महिला वित्तीय अधिकार सम्बन्धी कार्यक्रममा संगठनका अध्यक्ष सुयश प्याकुरेलले उक्त माग गरेका हुन् । महिलाहरूले स्थानीय शीप र श्रमको प्रयोग गरी सञ्चालन गरेको उद्योगलाई आर्थिक विकासमा समाहित गरी महिला सशक्तीकरणका माध्यमबाट जीवनस्तरमा सुधार ल्याउनुपर्ने बताए ।
महिला उद्यमशीलता प्रवर्द्धन, विकास एवं विस्तारका साथै क्षमता वृद्धि गराई उद्यमशीलता विकासको मूल प्रवाहमा महिला उद्यमीहरूको सहभागिता अभिवृद्धि गराउने उद्देश्यले उद्योग संगठन मोरङ, आर्थिक संयोजक समितिको आयोजनामा सोमवार महिला उद्यमशीलता प्रवद्र्धनमा सहयोग पुर्याउन महिला वित्तीय अधिकार सम्बन्धी अभिमुखीकरण कार्यक्रम गरिएको थियो ।
आर्थिक संयोजन समितिका संयोजक पारस लुनियाले परिवर्तित नीति नियम र बजारको प्रणालीका कारण महिला उद्यमीको सोच र सृजनात्मकताले विभिन्न समस्याको सामना गर्नुपरेको भन्दै उनीहरूको व्यावसायिक क्षमता विकासमा कार्यत्रमले सहयोग पुर्याउने विश्वास व्यक्त गरे । व्यवसाय सञ्चालन गर्ने क्रममा आइपर्ने प्रक्रियागत अप्ठ्याराहरूमा सहजीकरण गर्न संगठनले आगामी दिनमा सहयोगी डेस्क स्थापना गर्ने जानकारी उनले दिए ।
कार्यक्रममा कार्यपत्र प्रस्तुत गर्दै चार्टर्ड एकाउन्टेन्ट पियूष लुनिया र प्रतीश अग्रवालले कार्यपत्र प्रस्तुत गर्दै महिलाले उद्यमशीलता प्रारम्भ गर्नुपूर्व सरकारको नीति, महिलाका लागि प्रदान गरिएका सेवा तथा सुविधा लगायत विषयमा जानकारी राख्नुपर्ने बताए । कार्यपत्र प्रस्तुतीकरणको क्रममा उनीहरूले सामाजिक–राजनीतिक चेत, उद्यमशीलता विकास, स्वरोजगार तथा आयआर्जनतर्फ पनि महिलाले आफूलाई सशक्त बनाउँदै लैजानुपर्ने विचार व्यक्त गरे । कार्यक्रममा महिला उद्यम समितिको संयोजक प्रतिभा रिजाल ओली, सहसंयोजक जयश्री जाजू, समितिका सदस्यहरू, घरेलु तथा साना उद्योग महासंघ मोरङका प्रतिनिधिका साथै अन्य महिला उद्यमीहरूको सहभागिता थियो ।
