दक्षिण अफ्रिकामा भइरहेको विश्वकप फुटबलमा फुटबलको फ्यान नेपाल किन अनुपस्थित भइरहेको होला ? विश्वकपभन्दा भन्दा ठूला फुटबल खेल त यहाँ दिनहुँ भइरहेका छन् । । विश्वकपमा छालाको रबरको भकुण्डोको फुटबल खेलिन्छ जबकि नेपालको ब्रह्माण्डकपमा सिंगासिंगै मान्छे फुटबलको रूपमा प्रयोग गरिन्छ ।
अहिले चलिरहेको त्यस्तै फुटबलको म्याच हो, नेउवा महासंघ र सीएनआई नामक दुई धनाढ्य क्लबको । नेउवा महासंघका कप्तान जोशी छन् भने यसक पूर्वकप्तान चौधरी अहिले नेपाल उद्योग परिसंघ नामको नयाँ क्लबका कप्तान छन् ् । यी दुई स्थानीयबीचको खेल अहिले निकै रोमाञ्चक मोडमा पुगेको छ ।
चौधरीले पछिल्लोपटक हानेको एक पेनाल्टी गोललाई रेफ्रीरूपी सरकारले गोल मानेको छ । सो गोलबापत चौधरीले कुनै चीजको उत्पत्ति प्रमाण जारी गर्ने पुरस्कार पाए । महासंघका जोशी यो पेनाल्टीलाई अफ साइड भनेर चिच्याउँदै चौधरीलाई रेडकार्ड देखाउन कसरत गरिरहेका छन् ।
औद्योगिक घरानाहरूबीच वर्षौं हैन पुस्तौंदेखि फुटबल म्याच जारी छ । कुनभन्दा कुन घराना पुरानो, कोभन्दा को धनी, कसको भन्दा कसको कम्पनी बढी प्रोफेसनल र कर्पोरेटाइज्ड आदि विषयमा हानिने फ्रिकिक, पेनाल्टी आदिको दृष्टान्त बोलाबेलामा अखबारका पाना र वा टिभीका पर्दाहरूमा पनि एकपुस्ता, दुईपुस्ता लामो समयसम्म चल्ने गरेका छन् ।
अझ कम्पनी कम्पनी वा कम्पनीका उत्पादनका बीच बढी बजार हिस्सा पाउन हुने फुटबल म्याच भव्य मात्र छैनन् तिनमा ‘घाँटी रेट्ने’ प्रतिस्पर्धा नै हुने गरेको छ ।
(तीतोमीठो)
वर्ष ५, अंक ४१, २सी ६७, जेठ ३१–असार ६
