शेयरमा लगानी गर्न चाहनुहुन्छ ? ७०० रुपैयाँ सम्म पुगेका ३५ कम्पनीको शेयर मूल्य ३०० भन्दा कम !

वैशाख २०, काठमाडौं । भदौ २ गते ३२ सय विन्दु पार गरेर ऐतिहासिक रेकर्ड बनाएको नेप्से परिसूचक अहिले २३ सय विन्दु आसपासमा छ ।  परिसूचकले एतिहासिक रेकर्ड बनाउँदा ७/८ सयमाथि शेयर मूल्य पुगेका कम्पनीहरूकै शेयरमूल्य पनि अहिले ३०० रुपैयाँभन्दा तल आएको छ ।  नौ महीनाको अवधिमा बजार करीब १ हजार अंक घटेको छ । यही अवधिमा अधिकांश कम्पनीको शेयरमूल्य पनि सस्तिएको छ । व्यवसाय विस्तार र नाफा पनि राम्रो गरिरहेका कम्पनी कै पनि शेयर मूल्य अहिले ३०० रुपैयाँभन्दा तल झरेको छ ।  यसअघि शेयरमूल्य कम भएका कम्पनीहरूमा लगानीकर्ताको आकर्षण भएकाले ती कम्पनीको प्रफर्मेन्स राम्रो नभएपनि शेयर मूल्य उच्चदरले बढ्न पुगेको थियो । अझ वर्षैसम्म प्रतिफल नै नदिएका कम्पनीको पनि शेयर मूल्य उच्च दरले बढेको थियो ।  कतिपय कम्पनीको शेयर मूल्य त नेप्से परिसूचक १२/१३ सय विन्दुमा हुँदाको भन्दा पनि कम रहेको छ । ती कम्पनीले प्रतिफल पनि औसतमा राम्रै दिने गरेका भएपनि शेयर मूल्य बढ्न सकेको छैन् ।  नेपाल स्टक एक्सचेञ्ज (नेप्से) का अनुसार गत सोमवारको शेयर कारोबारका आधारमा शेयर मूल्य ३०० भन्दा कम ३५ ओटा कम्पनीको रहेको छ । उक्त दिन २०० रुपैयाँदेखि ३०० रुपैयाँको बीचमा यी कम्पनीको शेयर कारोबार भएको हो । यीमध्ये १४ ओटा वाणिज्य बैंक रहेका छन् भने बाँकी नेपाल इन्फ्रास्ट्रक्चर बैंक (निफ्रा), जलविद्युत् कम्पनी, फाइनान्स र विकास बैंक रहेका छन् ।  शेयरमूल्य ३०० रुपैयाँभन्दा कम हुने फाइनान्स कम्पनीमा समृद्धि र प्रोग्रेशिभ रहेका छन् । समृद्धि फाइनान्सको शेयरमूल्य सोमवार २७५ रुपैयाँ कायम भएको छ । त्यसैगरी प्रोग्रेशिभ फाइनान्सको भने शेयरमूल्य २९० रुपैयाँ कायम भएको छ । नेपालको एक मात्र पूर्वाधार क्षेत्रमा लागनी गर्न स्थापना भएको बैंक निफ्राको पनि सोमवार शेयरमूल्य २९५ रुपैयाँ ३० पैसा कायम भएको छ । त्यस्तै हाइड्रोइलेक्ट्रीसिटी इन्भेष्टमेण्ट एण्ड डेभलपमेन्ट कम्पनीको पनि शेयर मूल्य घटेर २४७ रुपैयाँ कायम भएको छ ।  पछिल्लो समय नेप्सेमा सूचिकृत कम्पनीहरूले  बोनस शेयर वितरण गरेर शेयरमूल्य पनि समायोजन गरेका छन् । यसले पनि शेयर मूल्य घट्नमा सहयाोग पुगेको हो ।  योसँगै शेयर बजार निरन्तर घट्दो क्रममा रहेको छ । यसले गर्दा यसअघि महँगा शेयर मूल्य भएका कम्पनीहरूको शेयरमूल्य सस्तिन पुगेको छ । दीर्घकालीन लगानी गर्ने सोच भएका लगानीकर्ताले यो समय कम्पनीको सम्पूर्ण वित्तीय विवरण र प्रफर्मेन्स हेरेर लगानी गरे आगामी दिनमा बजार बुलिस ट्रेडमा जाँदा कमाउँन सक्ने सम्भावन प्रसस्त रहेको अनुभवि लगानीकर्ता बताउँछन् ।  यसरी बजार घट्दै गएको अवस्थामा लगानीकर्ता आँत्तीन नहुँने पनि अनुभवी लगानीकर्ताको भनाइ छ । बजार घट्दै जाँदा बजारमा नयाँँ लगानीकर्ता प्रवेश कम हुने भएकाले पनि बजार थप घट्नमा मद्दत पुग्ने विश्लेषक बताउँछन् ।  त्यस्तै बजार बढ्दै गएको समयमा नयाँ लगानीकर्ता बजार प्रवेशमा उत्साही हुन्छन् । यसरी नयाँ लगानीकर्ता बुझ्दै नबुझी बजार प्रवेश गर्दा डुब्ने खतरा पनि बढी हुने गर्छ ।