नेपाल धितोपत्र बोर्डले स्टक एक्सचेञ्ज खोल्ने र थप ब्रोकरहरुलाई लाईसेन्स दिने योजना अगाडी सार्वजनिक गरेको छ । बोर्डले ग्लोबल मनी विकको सदर्भामा बोर्डले हालसम्म गरेका काम कारवाही र आगामी दिनको लक्ष्य सार्वजनिक गर्दै नयाँ स्टक एक्सचेञ्ज खोल्ने र थप ब्रोकरहरुलाई लाईसेन्स दिने योजना अगाडी सारेको हो।जस अनुसार बोर्डले निजीक्षेत्रमा एक आधुनिक तथा प्रतिस्पर्धी स्टक एक्सचेञ्ज र थप धितोपत्र दलाल व्यवसायीहरू तथा धितोपत्र दलाल व्यवसायीको आधिकारिक प्रतिनिधिको व्यवस्था गरी देशभर धितोपत्र खरिद बिक्री सेवाको पहुँच बढाउने, प्रदेशस्तरमा धितोपत्र बजार तथा वस्तु विनिमय बजारसम्बन्धी जनचेतना अभिवृद्धिसहित समष्टिगत वित्तीय साक्षरता सुदृढ गर्दै जाने उल्लेख गरेको छ।त्यस्तै बोर्डले नेपालको धितोपत्र बजार र वस्तु विनिमय बजारलाई विकास तथा विस्तार गर्दै स्वस्थ, पारदर्शी, प्रतिस्पर्धी र प्रभावकारी बनाई सर्वसाधारणको पहुँच बढाउने उद्देश्य लिई बोर्डले देहाय बमोजिमको प्राथमिकता तथा लक्ष्य निर्धारण गरेको जनाएको छ। धितोपत्र तथा वस्तु विनिमय बजारको विकास गरी IOSCO को पापदण्ड अनुरूपको बनाउँदै लैजाने, बोर्डको सूचना प्रविधि, भौतिक पूर्वाधार विकास र जनशक्तिको क्षमता विकास गरी संस्थागत तथा नियमन क्षमता अभिबृद्धि गर्ने र बोर्डको आफ्नै कार्यालय भवनको निर्माण गर्ने योजना पनि बोर्डले उल्लेख गरेको छ।त्यस्तै बोर्डले धितोपत्र बजार तथा वस्तु विनिमय बजारको प्रभावकारी नियमन, सुपरिवेक्षण तथा व्यवस्थापनका लागि आवश्यक कानुनी संरचनाको विकास तथा सुदृढीकरण गर्ने, बजार सुपरिवेक्षण व्यवस्थामा सुधार गर्नुका साथै अध्ययन/अनुसन्धान गर्ने, बजार सहभागीहरूको व्यवसायिकता तथा स्तर अभिवृद्धि र कार्य क्षेत्र विस्तार गर्ने जनाएको छ । माथि उल्लेख भएअनुसार समग्रमा बजारको विकास तथा विस्तार गर्ने,कानुनी संरचनामा सुधार गर्ने, संस्थागत तथा नियमन क्षमता सवलीकरण गर्ने, अध्ययन तथा अनुसन्धान र लगानीकर्ता प्रशिक्षणमार्फत् स्वच्छ, प्रतिस्पर्धी एवं विश्वसनीय धितोपत्र बजार तथा वस्तु विनिमय बजारको विकास तथा विस्तार गर्ने बोर्डको भावी कार्यदिशा रहेको बोर्डले उल्लेख गरेको छ।
