माघ २७, काठमाडौं । बोटलर्स नेपाल तराई र बोटलर्स नेपाल बालाजुले चालू आवको दोस्रो त्रैमासिक वित्तीय विवरण बिहीवार सार्वजनिक गरेका छन् ।
उक्त वित्तीय विवरण अनुसार दुबै कम्पनीको नाफामा वृद्धि भएको छ । चालू आवको दोस्रो त्रैमाससम्ममा बोटलर्स नेपाल बालाजुले रू.३५ करोड ८४ लाख नाफा कमाएको छ । उक्त कम्पनी गत आवको दोस्रो त्रैमाससम्ममा रू. १ करोड २२ लाख नोक्सानीमा रहेको थियो ।
चालू आवको दोस्रो त्रैमासमा कम्पनीको सञ्चालन आम्दानीमा वृद्धि भएकाले नाफामा सुधार आएको हो । गत आवको दोस्रो त्रैमाससम्ममा कम्पनीको सञ्चालन आम्दानी रू. ३ अर्ब ६० करोड रहेकोमा चालू आवको सोही अवधिमा वृद्धि भएर रू. ४ अर्ब ७५ करोड पुगेको हो । त्यसैगरी कम्पनीको नाफामा सुधार आएसँगै प्रतिशेयर आम्दानीमा पनि सुधार आएको छ ।
गत आवको दोस्रो त्रैमासमा कम्पनीको प्रतिशेयर आम्दानी रू.७ ऋणात्मक रहेकोमा चालू आवको सोही अवधीमा रू.१७० धनात्मक भएको हो । कम्पनीको चुक्तापूँजी रू. १९ करोड ४८ लाख रहेको छ भने जगेडामा रू. ४ अर्ब ३५ करोडभन्दा बढी सञ्चित रहेको छ । कम्पनीको प्रतिशेयर नेटवर्थ रू. २ हजार ४१३ रहेको छ ।
त्यसैगरी बोटर्लस नेपाल तराईले चालू आवको दोस्रो त्रैमाससम्ममा रू. ३० करोड २२ लाख नाफा कमाएको छ । यो नाफा गत आवको दोस्रो त्रैमासको तुलनामा १३ दशमलव ६७ गुणाले वृद्धि भएको हो । कम्पनीले गत आवको दोस्रो त्रैमाससम्ममा रू. २ करोड २० लाख नाफा कमाएको थियो ।
चालू आवको दोस्रो त्रैमासमा कम्पनीको सञ्चालन आम्दानीमा वृद्धि भएकाले नाफा बढेको हो । कम्पनीले गत आवको दोस्रो त्रैमाससम्ममा रू. २ अर्ब ५५ करोड सञ्चालन आम्दानी गरेकोमा चालू आवको सोही अवधिमा वृद्धि भएर रू. ३ अर्ब ४५ करोड पुगेको छ ।
कम्पनीको नाफामा वृद्धि भएसँगै प्रतिशेयर आम्दानी पनि वृद्धि भएको छ । गत आवको दोस्रो त्रैमाससमा कम्पनीको प्रतिशेयर आम्दानी रू. १८ रहेकोमा चालू आवको सोही अवधिमा वृद्धि भएर रू. २५० पुगेको हो । उक्त कम्पनीको चुक्तापूँजी रू. १२ करोड १० लाख रहेको छ भने जगेडामा रू. २ अर्ब ८८ करोड सञ्चित रहेकोे छ । त्यसैगरी कम्पनीको प्रतिशेयर नेटवर्थ रू. २ हजार ४८६ रहेको छ ।
