असार २८, दाङ । कुनैवेला तुलसीपुर - १४ भोजपुर निवासी होताराम खत्रीलाई घरको नजिकैबाट बबई नदी बग्दा र आफ्नो खेतबारी बाँझै हुँदा अत्यन्तै पिर लाग्थ्यो ।
तर पछिल्लो सयम उनको त्यो दुःख पीडा खुशीमा परिणत भएको छ । बृहत्त दाङ सिंचाइ आयोजनामार्फत बबई नदीको पानी लिफ्ट गरेर खेतबारीमा पुगेपछि आजभोलि किसानहरुको दुःखको दिन फेरिएको छ ।
लिफ्ट गरेर पानी माथि तानिएपछि आकाशे पानीमा भर पर्नुपर्ने यहाँको किसानको समस्या टरेको छ । लिफ्ट प्रविधिबाट बबई नदीको पानी खेतबारीमा पुगेपछि अहिले आफूहरुले बाह्रै महीना सिंचाइ सुविधा पाएको किसानहरु बताउँछन् ।
‘घरकै नजिकबाट नदी बग्दा र खेतवारी बाँझै हुँदा साह्रै पिडा भएर आउँथ्यो’, खत्रीले भने, ‘तर आजभोलि ती दिनहरु गएजस्तो लाग्छ, जतिवेला पनि खेतीबारीमा पानी लगाउन पाइएको छ ।’
बृहत्त दाङ सिंचाइँ आयोजना अन्तर्गत लिफ्ट सिंचाइ आयोजना सम्पन्न भएपछि त्यहाँका करीव ६० घर किसानहरुले आफ्नो खेतवारीमा सहजै सिंचाइ सुविधा पाएका छन् ।
६० घर किसानको करीब २९ बिघा मीनमा सिंचाइ सुविधा पुगेको आयोजनाका प्रमुख राजु आचार्यले बताए । बाह्रै महीना सिंचाइ सुविधा भएपछि त्यहाँका किसानहरुले मौसम अनुसारको विभिन्न खेतीहरु गरेर राम्रो आम्दानी पनि गरिरहेका छन् ।
करीब ७९ लाख रुपैयाँको लागतमा सञ्चालनमा ल्याइएको उक्त आयोजनामा १५ किलोवाट विद्युत् उत्पादन गर्न सक्ने सोलार जडान गरिएको आयोजना प्रमुख आचार्यले जानकारी दिए । केही स्थानमा सिंचाइ सुविधा पुगेपनि जिल्लाको अझै ५६ हजार हेक्टर जमीनमा सिंचाइ सुविधा पुग्न नसकेको र त्यसका लागि निरन्तर काम भइरहेको आचार्यको भनाइ छ ।
जिल्लामा हालसम्म २६ ओटा लिफ्ट सिंचाइ आयोजनामार्फत करीब ९०० हेक्टर जमीनमा सिंचाइ सुविधा पुगेको छ ।
