सिद्धकुमाख गाउँपालिका–५ दहका ७० वर्षीय टेकबहादुर रोका बुढ्यौलीमा पनि बाँस–निगालाको डोका बुनेर जीविकोपार्जन गर्न बाध्य छन् । दैनिक ३ वटासम्म डोको बुन्ने उनी जंगलबाट आफैं बाँस–निगाला काटेर ल्याउँछन् । बिक्री गर्न पनि बजार आफैं पुग्छन् । उनले बुनेको डोको १ सयदेखि १ सय ५० रुपैयाँमा बिक्री भइरहेको छ । ‘अरू काम केही गर्न सकिन्न,’ आफ्नै परिश्रमले ५ जनाको परिवार पालिरहेका उनले भने, ‘बुन्न पनि सजिलो छ, बजारको अभाव पनि छैन ।’ नियमित काम गर्ने बानीले बुढेसकालमा पनि फूर्तिलो बनाएको उनी बताउँछन् ।
