साउन १४, स्याङ्जा । जिल्ला अदालत स्याङ्जाले गत आर्थिक वर्ष २०७७/०७८ मा ५६१ ओटा मुद्दा फर्छ्यौट गरेको छ ।
अघिल्लो आर्थिक वर्ष २०७६/०७७ बाट जिम्मेवारी सरेर आएका ३८० मुद्दासहित गत आर्थिक वर्ष २०७७/०७८ मा दर्ता भएका ५८७ नयाँ मुद्दासहित कुल ९४७ मुद्दाहरुमध्ये गत आवमा ५६१ मुद्दा फैसला भएको जिल्ला अदालत स्याङ्जाका न्यायाधिश बसन्तराज पौडेलले बताए । अदातलबाट ३८६ ओटा मुद्दा फैसला गर्न बाँकी रहेको छ ।
जिल्ला अदालत स्याङ्जामा दर्ता भएका मुद्दाहरुमध्ये सबैभन्दा धेरै सम्बन्ध विच्छेदका छन् भने त्यसपछि क्रमशः अंशवण्डा, ज्यानसम्बन्धी, चोरी डकैती, लेनदेन, ठगी, जबर्जस्ती करणी, जालसाजी, बन, सवारी ज्यान मुद्दा, बहुबिबाह लगायतका मुद्दाहरु दर्ता भएका उनले बताए ।
अदालतमा दुई वर्ष नाघेका २१ मुद्दा छन् भने १८ महीनादेखि दुई वर्षसम्मका एउटा मुद्दा मात्रै रहेको छ । एक वर्षदेखि १८ महीनासम्मका १४२ मुद्दा, ६ महीनादेखि १ वर्षसम्मका १३१ मुद्दाहरु फैसला गर्न बाँकी रहेका उनले बताए ।
विश्वव्यापी महामारीकोरुपमा फैलिएको कोभिड १९ का कारण पनि अदालतबाट मुद्दा फर्छ्यौटमा तीव्रता दिई कार्य भएको अदालतले जानकारी दिएको छ । अब फर्छ्यौट हुन बाँकी रहेको ३८६ मुद्दाहरुमध्ये दुनियावादी देवानी २०७, सरकारवादी फौजदारी १२८, दुनियावादी फौजदारी ४९ र पुनरावेदन २ ओटा रहेका स्रेस्तेदार विश्वप्रसाद रेग्मीले बताए ।
जिल्ला अदालत स्याङ्जाबाट गत आर्थिक वर्ष २०७६/०७७ मा अभियुक्तहरुबाट ४९२ वर्ष १ महीना कैद भुक्तानी भएको छ । अभियुक्तहरुबाट रू. ३८ लाख ७७ हजार ३३८ जरिवाना फर्छ्यौट भएको स्रेस्तेदार रेग्मीले बताए ।
