भिजन लुम्बिनी उर्जा कम्पनीको आईपीओ आजबाट, कस्तो छ कम्पनीको अवस्था ? (भिडियो रिपोर्ट)

काठमाडौं । भिजन लुम्बिनी उर्जा कम्पनी लिमिटेडले आजबाट सर्वसाधारणका लागि आईपीओ निष्कासन गर्दैछ । यसअघि कम्पनीले आयोजना प्रभावित स्थानीय र वैदेशिक रोजगारीमा रहेका नेपालीका लागि आईपीओ विक्री तथा बाँडफाँट गरिसकेको छ । कम्पनीले आयोजना प्रभावित स्थानीयका लागि १९ लाख १२ हजार ५०० कित्ता आईपीओ विक्री खुला गरेकोमा १४ लाख २४ हजार ५९० कित्ता मात्र विक्री भएको छ । स्थानीयमा विक्री हुन नसकेको ४ लाख ८७ हजार ९१० कित्ता आईपीओसमेत थप गरी सर्वसाधारणमा विक्री गर्न लागिएको हो । आयोजना प्रभावित स्थानीयमा कम्पनीले कात्तिक १ गते र वैदेशिक रोजगारीमा रहेका नेपालीमा असोज १५ गते आईपीओ बाँडफाँट गरेको हो । वैदेशिक रोजगारीमा रहेका नेपालीमा १ लाख ९१ हजार २५० कित्ता आईपीओ बाँडफाँट गरिएको हो । अब ९५ हजार ६२५ कित्ता सामूहिक लगानी कोषका लागि र ३८ हजार २५० कित्ता कर्मचारीहरूका लागि सुरक्षित गरी बाँकी रहेको २० लाख ७५ हजार २८५ कित्ता आईपीओ सार्वजनिक निष्कासनमा ल्याउन लागिएको हो । सर्वसाधारणले यो आईपीओ खरीदका लागि न्यूनतम १० कित्तादेखि अधिकतम ३ लाख ८० हजार कित्तासम्म माग गर्न सक्नेछन् । आईपीओ विक्री अवधि छिटोमा कात्तिक २० गतेसम्मका लागि तोकिएको छ । छिटो अवधिभित्र मागबमोजिम आवेदन नपरेमा भने ढिलोमा मंसिर १ गतेसम्म विक्री लम्बिनेछ । तर, पछिल्लो समय सर्वसाधारणमा आईपीओ जारी हुँदा पहिलो दिनमा नै मागभन्दा बढी आवेदन पर्ने गरेकाले यो कम्पनीको आईपीओ पनि छिटो अवधिसम्म मात्र विक्रीमा रहने निश्चित देखिन्छ ।  यो आईपीओ निष्कासन तथा विक्री प्रबन्धकमा मुक्तिनाथ क्यापिटल लिमिटेड छ । विक्री प्रबन्धकसँगै लगानीकर्ताहरूले नेपाल धितोपत्र बोर्डबाट स्वीकृतिप्राप्त सम्पूर्ण सि–आस्बा सदस्य बैंक तथा वित्तीय संस्था र तिनका तोकिएका शाखा कार्यालयहरूबाट आवेदन दिन सकिनेछ । साथै मेरो शेयर अनलाइनसमेत आवेदनका लागि प्रयोग गर्न सकिने व्यवस्था छ । आईपीओ निष्कासनको लागि गराएको रेटिङ्गमा इन्फोमेरिक्स क्रेडिट रेटिङ्ग नेपालले कम्पनीलाई आईआरएन डबल बी माइनस इस्यूअर रेटिङ्ग प्रदान गरेको छ । यस रेटिङ्गले कम्पनीको वित्तीय दायित्व वहन गर्ने क्षमतामा औसत जोखिम रहेको संकेत गर्दछ ।  कम्पनीको परिचय यो कम्पनी २०७५ असोज २६ गते कम्पनी रजिष्ट्रारको कार्यालयमा पब्लिक लिमिटेड कम्पनीको रूपमा दर्ता भई सञ्चालनमा छ । कम्पनीको रजिष्टर्ड कार्यालय रूपन्देही, बुटवल महानगरपालिका वडा नम्बर ६ मा छ भने कर्पोरेट कार्यालय काठमाडौंको बुद्धनगरमा छ । कम्पनीको संस्थापक शेयरधनीको रूपमा हाइड्रोईलेक्ट्रीसिटी इन्भेष्टमेण्ट एण्ड डेभलपमेन्ट कम्पनी, शाईन रेसुङ्गा डेभलपमेण्ट बैंक, रिलायन्स लाईफ इन्स्योरेन्स, प्रभु लाइफ इन्स्योरेन्स, सेन्ट्रल फाइनान्स, मल्टीपर्पस फाइनान्स , लुम्बिनी मेडिकल कलेज, न्यू होराइजन इग्लिस सेकेण्डरी स्कुल, मुक्तिनाथ क्यापिटल, युनाइटेड टेक्निकल कलेज, भिजन लुम्बिनीलगायत छन् । कम्पनीले कास्कीमा २५ मेगावाट क्षमताको सेतीनदी जलविद्युत आयोजना निर्माण गरिरहेको छ । उक्त आयोजनाको कुल अनुमानित लागत ५ अर्ब २० करोड रुपैयाँ छ भने प्रतिमेगावाट कुल अनुमानित लागत २० करोड ८० लाख रुपैयाँ छ । उर्जा जलस्रोत तथा सिँचाइ मन्त्रालयबाट २०७७ असार १५ गते कम्पनीले विद्युत उत्पादनको अनुमति प्राप्त गरेको थियो । यो अनुमति पत्र २११२ असार १४ गतेसम्म बहाल रहनेछ । पूँजी संरचना  २ अर्ब रुपैयाँ अधिकृत पूँजी रहेको कम्पनीको जारी पूँजी १ अर्ब ९१ करोड २५ लाख रुपैयाँ छ । हाल संस्थापक शेयरधनीहरूबाट चुक्ता भएको पूँजी १ अर्ब ५३ करोड २५ लाख रुपैयाँ छ । सर्वसाधारणमा सम्पूर्ण कित्ता आईपीओ विक्री तथा बाँडफाँटपछि कम्पनीको चुक्ता पूँजी १ अर्ब ९१ करोड २५ लाख रुपैयाँ कायम हुनेछ । कम्पनीको संस्थापकतर्फ ८० प्रतिशत र आयोजना प्रभावित स्थानीय समेत सर्वसाधारणमा २० प्रतिशत शेयर स्वामित्व कायम हुनेछ । आईपीओ निष्कासबाट संकलित पूँजी कम्पनीले आयोजना निर्माणका लागि खर्चिने जानकारी दिएको छ ।  वित्तीय अवस्था  कम्पनीले सार्वजनिक गरेको आर्थिक वर्ष ०७६/७७ देखि ०७८/७९ सम्मको तीन आर्थिक वर्षको वास्तविक वित्तीय विवरण अनुसार निरन्तर सञ्चित नाफामा रहेको देखिन्छ । आर्थिक वर्ष ०७६/७७ मा ९ करोड ६ लाख रुपैयाँभन्दा बढी सञ्चित नाफामा रहेको कम्पनी आर्थिक वर्ष ०७७/७८ मा ५ करोड १६ लाख रुपैयाँभन्दा बढी सञ्चित नाफामा थियो । आर्थिक वर्ष ०७८/७९ मा भने कम्पनी ३३ करोड ४ लाख रुपैयाँभन्दा बढी सञ्चित नाफामा छ । आर्थिक वर्ष ०७९/८० सम्मको अपरिस्कृत वित्तीय विवरण अनुसार भने कम्पनी ६० करोड ८५ लाख रुपैयाँभन्दा बढी सञ्चित नाफामा छ । चालू आर्थिक वर्षको अन्त्यसम्म भने ९० करोड रुपैयाँभन्दा बढी सञ्चित नाफा गर्ने कम्पनीको प्रक्षेपण छ । पछिल्लो आर्थिक वर्षको वास्तविक वित्तीय विवरण अनुसार कम्पनीको प्रतिशेयर नेटवर्थ १२१ रुपैयाँ ७८ पैसा र प्रतिशेयर आम्दानी २६ रुपैयाँ ५५ पैसा छ ।  सञ्चालक समिति हाल यस कम्पनीमा ११ सदस्यीय सञ्चालक समिति छ । कार्यकारी अध्यक्षमा जगत बहादुर पोखरेल छन् । संस्थापकतर्फको १ लाख ९० हजार ४०२ कित्ता शेयर स्वामित्व कायम गरेका कार्यकारी अध्यक्ष पोखरेलले व्यवस्थापन र कानुन विषयमा स्नातक गरेका छन् । कम्पनीको सञ्चालकहरूमा भने लेखनाथ पाण्डे, ज्ञानेन्द्र प्रसाद कसजु श्रेष्ठ, दिपक बहादुर शाक्य, विनोद ज्ञवाली, सन्तोष पोखरेल, यम बहादुर गुरुङ, बासुदेव भण्डारी, सुदिप सिंह अधिकारी, प्रजन्य विक्रम पोखरेल र तेज कुमार गुरुङ छन् । कति पाउला दोस्रो बजारमा पहिलो कारोबार मूल्य ? प्रतिकित्ता १०० रुपैयाँमै खरीद गरिएको कम्पनीको आईपीओले दोस्रो बजारमा कति मूल्य पाउला भन्ने जिज्ञासा सबैमा हुने गर्छ । दोस्रो बजार सञ्चालक नेपाल स्टक एक्सचेञ्ज (नेप्से) ले कम्पनीको वास्तविक प्रतिशेयर नेटवर्थको आधारमा तीन गुणासम्मको मूल्य रेञ्ज पहिलो कारोबारका लागि तोक्ने गर्दछ । यसर्थ कम्पनीको वास्तविक प्रतिशेयर नेटवर्थको आधारमा न्यूनतम प्रतिकित्ता १२१ रुपैयाँ ७८ पैसादेखि अधिकतम प्रतिकित्ता ३६५ रुपैयाँ ३४ पैसासम्मको मूल्य रेञ्ज पाउने देखिन्छ ।