साउन १४, काठमाडौं । अर्थ मन्त्रालयले नेपाल धितोपत्र बोर्डलाई तीन दिनभित्र स्पष्टिकरण बुझाउन माग गरेको छ ।
विभिन्न सञ्चार माध्यमहरुमा धितोपत्र बोर्डसँग सम्वन्धित समाचारप्रति ध्यानाकर्षण भएको भन्दै मन्त्रालयले बुधवार पत्राचार गर्दै तीन दिनभित्र सत्यतथ्य यथार्थता के हो ? सोको स्पष्ट र तथ्यपरक विवरण तीन दिनभित्र उपलब्ध गराउन भनेको हो ।
बोर्डका अध्यक्ष भिष्मराज ढुङ्गानाको परिवार भित्रका सदस्यको नाममा शेयर खरीद भएको समाचार वाहिरिएपछि मन्त्रालयले पनि बोर्डसमक्ष स्पष्टिकरण माग गरेको हो ।
नेपालको धितोपत्र बजारकै इतिहासमा पहिलो पटक बुक विल्डिङ्ग विधिबाट आईपीओ जारी गर्न लागेको सर्वोत्तम सिमेण्ट्को शेयर खरीदमा ढुङ्गानाको परिवारको सदस्यको नाममा शेयर खरीद भएको समाचार विभिन्न सञ्चारमाध्यमा सार्वजनिक भएको छ ।
ढुङ्गानाकी बिबाहित छोरी रेबिका ढुङ्गानाको नाममा सर्वोत्तम सिमेण्टको ११ हजार ९१२ कित्ता शेयर लागत कायम भएको देखिएको हो । बोर्डका अध्यक्ष ढुङ्गानाले विभिन्न सञ्चारमाध्यममा सर्वोत्तम सिमेण्टको शेयर छोरीको नाममा रहेको स्वीकार गरिसेकका छन् ।
बिवाह भएर आफुसँग छुट्टिएर गइसकेकी छोरीमा शेयर खरीदविक्री गर्न पाउने अधिकार हुने तर्कसमेत ढुङ्गानाको छ । आफुले पदिय मर्यादा विपरित कुनै काम नगरेको भन्दै ढुङ्गानाले केहि दिन अवस्था तनावपूर्ण भएपनि अन्तिममा सत्यको जीत हुने बताएका छन् ।
यसैबीच नेपाल स्टक एक्सचेञ्ज(नेप्से) का प्रमुख कार्यकारी अधिकृत चन्द्रसिंह साउद तथा नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकाललाई पनि सोही प्रसंगमा आरोप लागेका समाचारहरु प्रकाशित भएका छन् ।
