काठमाडौं (अस) । नेपाल चेम्बर अफ कमर्स र नेपाल चिकित्सक संघले महामारीका रूपमा फैलिएको कोभिड(१९ रोकथाम तथा नियन्त्रणका लागि ‘सम्पूर्ण नेपालीको जीवनरक्षाका लागि हामी एक हौं’ अभियान सुरु गरेका छन् । अभियानस्वरूप चेम्बर तथा संघको सहकार्यमा टेलिमेडिसिन सेन्टर अन कोभिड–१९ आइतबारदेखि सञ्चालनमा आएकोे छ ।
टेलिमेडिसिन सेन्टरका चेम्बरले मुख्य प्रायोजन गरेको छ । चेम्बर अध्यक्ष राजेन्द्र मल्ल र संघका अध्यक्ष डा. लोचन कार्कीले संयुक्त रूपमा उक्त केन्द्र सञ्चालनको घोषणा गरेका हुन् ।
कार्यक्रममा अध्यक्ष मल्लले विश्वव्यापी महामारीको रूपमा फैलिएको कोरोनाबाट प्रभावित व्यक्तिले स्वदेश तथा विदेशमा बस्नेले यो केन्द्रबाट अनलाइन परामर्श प्राप्त गर्न सक्ने जानकारी दिए ।
चेम्बरले कोभिड व्यवस्थापन समिति गठन गरी विभिन्न सरकारी अस्पताललाई कोभिड नियन्त्रणका सामग्री तथा उपकरण हस्तान्तरण गरिरहेको उनले बताए ।
केन्द्र सञ्चालनका लागि साल्ट ट्रेडिङ कर्पोरेशन तथा ईश्वरलाल प्रतिष्ठानको पनि सह–प्रायोजन रहेको छ । केन्द्रबाट सेवा लिन इच्छुकले मेरो डाक्टर एप डाउनलोड गर्न सक्ने चेम्बरले बताएको छ ।